ڈوڈہ میں رہائشی مکان جل کر تباہ

گھر کے اندر موجود تمام ساز و سامان جل کر راکھ ہوگیا۔ تاہم اس واقعے میں کسی بھی جانی نقصان کی اطلاع نہیں ہے۔

جموں و کشمیر کے پہاڑی ضلع ڈوڈہ کی تحصیل بھاگواہ کے دور دراز گاؤں دھاروش میں آگ کی ایک ہولناک واردات میں ایک رہائشی مکان جل کر تباہ ہو گیا ہے۔

تفصیلات کے مطابق آتشزدگی کی یہ واردات پیر کے روز بعد دوپہر پشی آئی اور مختصر وقت میں پورا گھر جل کر تباہ ہو گیا۔ عینی شاہدین کے مطابق آگ کی ہولناک واردات عبدالمجید کوکا ولد عبدالجبیر کے تین منزلہ رہائشی مکان میں پیش آئی۔ گھر کے اندر موجود تمام ساز و سامان جل کر راکھ ہو گیا۔ تاہم اس واقعے میں کسی بھی جانی نقصان کی اطلاع نہیں ہے۔

آگ لگنے کی وجہ شارٹ سرکٹ بتائی جا رہی ہے چونکہ آگ تیسری منزل سے نمودار ہوئی تھی۔ عبدالمجید مزدور پیشہ سے وابستہ ہیں اور اس وقت ہماچل پردیش میں مزدوری کا کام کر رہے ہیں۔ وہیں ڈوڈہ کی معروف سماجی فلاحی تنظیم ابابیل کے رضاکار آگ متاثرین کو فوری طور امداد پہنچانے کے لئے مذکورہ گاؤں پہنچے اور متاثرہ کنبہ کو ضروری سامان فراہم کیا۔