محکمہ صحت کی جانب سے ڈوڈہ میں کورونا تربیتی کورس کا افتتاح

اکیس دِنوں پر مشتمل تربیتی کورس میں طلباء کو کورونا وائرس سے لڑنے اور گاؤں دیہات میں رہائش پذیر آبادی کو ویکسین کی ڈوز فراہم کرنے کے لئے بھی تیار کیا جائے گا۔

محکمہ صحت کی جانب سے پہاڑی ضلع ڈوڈہ کے اے این ایم ٹی اسکول میں جموں کشمیر سکل مشن کے تحت ایک تربیتی کورس کا افتتاح کیا گیا۔

افتتاحی تقریب کے موقع پر چیف میڈیکل افسر ڈوڈہ ، ڈپٹی سی ایم او، میڈیکل سپرنٹنڈنٹ کے علاوہ اے ای ایم ٹی سکول کے پرنسپل سمیت محکمہ صحت کے افسران نے شرکت کی۔

اس موقع پر خطاب کرتے ہوئے چیف میڈیکل افسر ڈوڈہ نے بتایا کہ جموں و کشمیر میں سکل مشن کے تحت آئی ٹی آئی طلبہ کو طبی کورس کرایا جا رہا ہے۔ انکے مطابق پہلے مرحلے میں ساٹھ طلباء و طالبات کو صحت کے متعلق تربیت فراہم کی جائے گی۔

چی ایم او نے کورس کی تفصیلات فراہم کرتے ہوئے کہا کہ اکیس دِنوں پر مشتمل تربیتی کورس میں طلباء کو کورونا وائرس سے لڑنے اور گاؤں دیہات میں آبادی کو کورونا ویکسین کی ڈوز فراہم کرنے کے لئے بھی تیار کیا جائے گا۔

انہوں نے مزید کہا کہ طلباء کو کاؤنسلنگ کے ذریعے نامزد کیا گیا جنہیں مفت تربیت فراہم کی جا رہی ہے۔ تربیتی کورس میں بیسک لائف سپورٹ، اور ایڈونس کیئر سپورٹ سمیت ہوم کیئر سپورٹ کے متعلق بنیادی تربیت فراہم کی جا رہی ہے۔

سی ایم او نے شرکاء کو اس پروگرام کی اہمیت و افادیت کے متعلق تفصیلی بریفنگ دیتے ہوئے امید ظاہر کی کہ تربیت حاصل کرنے کے بعد طلباء اپنے اپنے علاقوں سمیت دور دراز کے دیہات میں لوگوں کو طبی امداد فراہم کرنے میں اہم رول ادا کرنے کے علاوہ ہنگامی صورتحال میں محکمہ صحت کو تعاون فراہم کریں گے۔

تربیتی کورس میں شرکت کر رہے طلبہ نے ای ٹی وی بھارت کے ساتھ بات کرتے ہوئے محکمہ صحت سمیت ضلع انتظامیہ کی ستائش کرتے ہوئے کہا کہ اس طرح کے کورس سے انہیں کافی فائدہ حاصل ہو گا۔

انہوں نے دور دراز علاقہ جات میں بھی اس طرح کے کورس منعقد کرائے جانے کی بھی سفارش کی۔