ڈوڈہ: زلزلے کے جھٹکے سے عوام میں خوف و دہشت

جموں و کشمیر کے پہاڑی ضلع ڈوڈہ میں پیر کی صبح چار اعشاریہ چھ کی شدت کا زلزلہ ریکارڈ کیا گیا۔

جموں و کشمیر میں خطہ چناب کے ضلع ڈوڈہ اور کشتواڑ میں پیر کی صبح زلزلے کے جھٹکے محسوس کئے گئے، جس وجہ سے لوگوں میں خوف و دہشت کا ماحول پیدا ہو گیا، ہر کوئی اپنے گھروں سے باہر نکلنے کی کوشش کرنے لگا۔

ڈوڈہ کے مختلف مقامات پر زلزلے کے جھٹکے محسوس ہونے کے بعد اور ماضی میں زلزلے سے ہوئی بھاری تباہی کے خوف کی وجہ سے لوگوں نے چیخ و پکار شروع کر دی تاہم ابھی تک کسی بھی علاقہ سے کسی جانی یا مالی نقصان کی اطلاع نہیں ہے۔

زلزلے کے جھٹکے محسوس ہوتے ہی لوگوں نے گھروں سے باہر نکلنے کی کوشش کی اور ہر کوئی اپنی جان بچانے کی فراق میں تھا۔

ریکٹر سکیل پر زلزلے کی شدّت چار اعشایہ چھ ریکارڈ کی گئی ہے اور اس کا مرکز کشتواڑ سے گیارہ کلو میٹر دور جنوب مشرق کی طرف بتایا جا رہا ہے۔ جبکہ زلزلہ کی گہرائی زیر زمین 42 کلو میٹر تھی۔