ڈوڈہ: گندوہ میں پولیس اہلکاروں کو کووڈ ٹیکہ لگایا گیا

ضلع ڈوڈہ میں بھی دیگر اضلاع کی طرح دوسرے مرحلے کی ویکسینیشن مہم کے تحت فرنٹ لائن ورکرز کو کورونا ویکسین لگائی جا رہی ہے۔

پہاڑی ضلع ڈوڈہ کے گندوہ بھلیسہ میں سب ضلع اسپتال میں کورونا ویکسین مہم کے دوسرے مرحلے کے تحت پولیس اہلکاروں اور وی ڈی سی ممبران کی ٹیکہ کاری مہم جاری ہے۔

ضلع ڈوڈہ کے مختلف دیہات اور علاقہ جات میں بھی دیگر اضلاع کی طرح دوسرے مرحلے کی ویکسینیشن مہم کے تحت فرنٹ لائن ورکرز، جن میں پولیس اہلکار، وی ڈی سی ممبران، محکمۂ مال اور آنگن واڑی ورکرز شامل ہیں کو کورونا ویکسین لگائی جا رہی ہے۔

اس سے قبل محکمہ صحت سے وابستہ طبی و نیم طبی اور دیگر عملہ کو کورونا ویکسین فراہم کی جا چکی ہے۔

اس موقع پر ڈاکٹر پرویز احمد نے تفصیلات فراہم کرتے ہوئے کہا کہ 'ضلع میں ابھی تک چھ سو سے زائد افراد کو کورونا ویکسین کی خوراک دی جا چکی ہے اور ابھی تک کسی بھی قسم کی کوئی شکایت موصول نہیں ہوئی ہے۔'

انہوں نے عوام سے افواہوں پر کان نہ دھرنے کی اپیل کرتے ہوئے کہا کہ سبھی افراد کو مشتہر کردہ شیڈول کے مطابق رضاکارانہ طور ویکسین کی خوراک لینی چاہئے۔