ڈوڈہ میں عالمی وبا کے مثبت معاملات کی شرح 3.3 فیصد

ضلع ترقیاتی کمشنر، ڈوڈہ نے پریس بریفنگ کے دوران کہا کہ ضلع میں مثبت اور فعال معاملات میں لگاتار کمی واقع ہو رہی ہے۔

’’عالمی وبا کورونا وائرس کے طویل المدتی اثرات کو دور کرنے کے لئے ڈوڈہ ضلع انتظامیہ کی جانب سے 18 سال سے زائد عمر کے لوگوں کے لئے نامزد ویکسینیشن مراکز پر ٹیکہ کاری کا سلسلہ تیزی کے ساتھ جاری ہے۔

اس کے علاوہ دکانداروں، صحافیوں کو خصوصی طور ہائی رسک زمرے میں لاکر اُن کو ٹیکے لگائے جا رہے ہیں۔‘‘ ان باتوں کا اظہار ڈی سی دفتر ڈوڈہ میں پریس کانفرنس سے خطاب کرتے ہوئے ضلع ترقیاتی کمشنر ڈوڈہ وکاس شرما نے کیا۔

ڈی سی ڈوڈہ نے پریس بریفنگ کے دوران ضلع میں عالمی وبا کورونا وائرس کی موجودہ صورتحال کے متعلق معلومات فراہم کرتے ہوئے کہا کہ 45 سال سے زیادہ عمر کی 72 فیصد آبادی کو ٹیکے لگائے جا چکے ہیں۔ اس کے علاوہ نو ویکسینیشن مراکز پر 18 سے 45 سال کی عمر کے افراد کے لئے ویکسینیشن ڈرائیو بھی جاری ہے۔

کووڈ مثبت معاملات کے حوالے سے ڈی سی نے بتایا کہ اس ماہ کے آغاز میں کورونا مثبت معاملات کی شرح 7 اعشاریہ سار فیصد تھی جو اب ضلع میں صرف 804 فعال معاملات کے ساتھ کم ہوکر 3.3 فیصد تک نیچے آ گئی ہے۔

آکسیجن کی دستیابی کے بارے میں ڈی سی نے بتایا کہ موجودہ انفراسٹرکچر کے علاوہ اضافی 750 ایل پی ایم او جی پی کو آج ہی شروع کیا جا سکتا ہے۔ اس کے علاوہ یہ بھی کہا کہ نئے بنائے گئے سی سی سنٹرز میں 63 آکسیجن کنسنٹریٹرس رکھے گئے ہیں۔

انہوں نے کہا کہ این جی اوز بھی کووڈ19 وبائی مرض کے خلاف جنگ میں ضلع انتظامیہ کی حمایت کے لئے آگے آ رہی ہیں۔