ڈوڈہ: روزگار بخش تربیتی کورس کیلئے ایک درجن طلبا راجستھان روانہ

فوج کی جانب سے ’ہمت‘ اسکیم کے تحت پہاڑی ضلع ڈوڈہ کے ایک درجن طلبا کو روزگار بخش تربیتی کورس کے لیے راجستھان روانہ کیا گیا۔

ضلع ڈوڈہ کے مختلف علاقوں سے تعلق رکھنے والے بارہ طلبا پر مشتمل ایک گروپ کو فوج کی 10راشٹریہ رائفلز کی جانب سے تین ماہ کے تربیتی کورس کے لیے روانہ کیا گیا۔

روزگار بخش تربیتی کورس کے دوران طلبا کو رہائش اور ٹرانسپورٹ کی مفت سہولیات فراہم کی جائیں گی۔

راجستھان کے دورے پر روانہ ہونے والے طلبا نے فوج کی کاوشوں کی سراہنا کرتے ہوئے کہا کہ اس طرح کے تربیتی کورس سے بے روزگار نوجوانوں کو روزگار کے مختلف مواقع فراہم ہونے کی امید ہے۔

فوجی افسران نے کہا کہ فوج کی جانب سے نوجوانوں کے لیے روزگار بخش کورسز کا انعقاد فوج کی ترجیحات میں شامل ہے۔

انہوں نے مزید کہا کہ مستقبل میں بھی اس طرح کے کورسز کا انعقاد کیا جائے گا تاکہ نوجوانوں کو روزگار کے بہتر مواقع مل سکیں۔