تیز رفتار ٹریکٹر سے کچل کر ایک نوجوان کی موت، ایک زخمی

ایک طرف جہاں نوئیڈا میں دوسرا روڈ سیفٹی ویک جاری ہے۔ وہیں کوتوالی فیس 3 کے تحت ہنڈن ندی کے کنارے اسٹیڈیم کے قریب بے قابو ٹریکٹر کی زد میں آنے سے ایک نوعمر لڑکا ہلاک اور ایک زخمی ہوگیا ہے۔

پولیس کے مطابق نوئیڈا کے سیکٹر 24 کے رہنے والے ملنان بھاردواج (15) اور سیکٹر 7 میں رہنے والے اتل کمار (16) ہنڈن ندی کے ساحل پر اسٹیڈیم کے قریب اسکوٹی پر بیٹھے تھے۔

اسی دوران مخالف سمت سے آنے والا ایک بے قابو ٹریکٹر ان کے اوپر چڑھ گیا اس حادثے میں دونوں زخمی ہوگئے۔ جنہیں مقامی لوگوں کی مدد سے اسپتال میں داخل کر دیا گیا جہاں ڈاکٹروں نے ملنان کو مردہ قرار دے دیا۔

جبکہ اتل کو معمولی چوٹیں آئی ہیں یہ دونوں نوعمر ہنڈن ندی کے کنارے اسٹیڈیم میں کرکٹ کھیلنے گئے تھے اور لوٹتے وقت سڑک کنارے اپنے ایک دوست کا انتظار کر رہے تھے۔

تب ہی اتھارٹی میں کام کرنے والا تیز رفتار ٹریکٹر ان کی موت بن کر سامنے آیا۔ ڈرائیور ٹریکٹر چھوڑ کر فرار ہو گیا ہے جس کی تلاش جاری ہے۔