نئی دہلی: فورم اگینسٹ ماب لنچنگ اینڈ ان جسٹس کے بینر تلے عالمی یوم صداقت کے موقع پر امبیڈکر سماج پارٹی کے قومی دفتر میں صحافیوں سے بات کرتے ہوئے بھائی تیج سنگھ کنوینر فورم اگینسٹ ماب لنچنگ اینڈ ان جسٹس و قومی صدر امبیڈکر سماج پارٹی نے ملک میں بڑھتی حقوق انسانی کی پامالی اور آئینی بحران پر تشویش کا اظہار کرتے ہوئے موجودہ حکومت کو تنقید کا نشانہ بنایا۔ انھوں نے کہا کہ بے لگام بھیڑ کے ذریعے اقلیتوں کی ماب لنچنگ اور دلتوں پر بڑھتے بے پناہ ظلم کو دیکھ کر ایسا لگتا ہے کہ ملک کے حکمرانوں نے آئین کو بالائے طاق رکھ کر سنگھ کے ایجنڈے کو بالواسطہ طور پر نافذ کرنا شروع کر دیا گیا ہے۔ ایسے میں آج حقوق انسانی کی تحفظ کے لیے عالمی یوم صداقت پر میں ملک کے تمام سچے محب وطن کو دعوت دیتا ہوں کہ وہ تمام تر آپسی اختلافات کو مٹاکر آئین اور انسانیت کے تحفظ کے لیے متحد ہو کر سچی سیاست کو فروغ دیں۔
اس موقع پر بھائی تیج سنگھ نے موجودہ مرکزی حکومت کی کارکردگی پر برہمی کا اظہار کر تے ہوئے کہا کہ وزیر اعظم نریندر مودی جس آئین کی وجہ سے وزیر اعظم بنے ہیں اسی آئین کو مٹانے کے لیے سنگھ کا ساتھ سنگھ کا وکاس اور سنگھ کا وشواس پر عمل پیرا ہیں۔ ایسے میں درجہ فہرست ذاتوں، امبیڈکر وادیوں اور ملک کے تمام اقلیتوں کو انسانی حقوق کی پامالی کو روکنے کے لیے اور ایماندار سیاست کو فروغ دینے کے لیے متحدہ لائحہ عمل طے کرنا ضروری ہے۔