Jamia millia van mahotsav : جامعہ ملیہ اسلامیہ کے سینئر سکینڈری اسکول میں ’ون مہوتسو‘

جامعہ ملیہ اسلامیہ کے سینئر سیکنڈری اسکول اس سال بھی ’’ون مہتسو‘‘ منا رہا ہے۔ جس کا مقصد درختوں اور جنگلات کے تحفظ کی اہمیت کے متعلق بیداری و آگاہی پیدا کرناہے۔ مہوتسو کو فاریسٹ فیسٹول بھی کہا جاتاہے اور اس سالانہ پروگرام کے تحت ہر برس جولائی کے مہینے میں ماحولیاتی تحفظ کے فروغ اور شجر کاری کے فروغ کے لیے کئی سرگرمیاں منعقد کی جاتی ہیں۔

نئی دہلی:جامعہ ملیہ اسلامیہ کے سینئر سیکنڈری اسکول (جے ایس ایس ایس) میں اس سال ون مہتسو تقریبات کا آغاز اسکول کے احاطے میں شجرکاری مہم اور ٹیلنٹ ایوارڈ پروگرام سے ہوا۔ اسکول کے طلبا، اساتذہ اور اسٹاف نے اس ماحول دوست سرگرمی میں بڑھ چڑھ کر حصہ لیا۔ منتظمین کے مطابق پروگرام کا مقصد صرف ہریالی بڑھانانہیں، بلکہ ماحولیاتی توازن اور ماحولیاتی مسائل سے نمٹنے کی اہمیت کے تئیں طلبا میں بیدار ی پیدا کرنا بھی ہے۔ اسکول کے سابق فارغین کی موجودگی سے پروگرام میں چار چاند لگ گئے۔ انہیں اس پروگرام میں مدعو کیا گیا تھا۔ اس موقع پر انہوں نے اپنے تعلیمی دور کی بیش قیمت یادیں اور تجربات شیئر کئے۔

قدیم طلبا کی حصولیابیوں کو دکھا کر اور ان کی زندگیوں پر مادر علمی کا کیا اثر ہے اس سے موجودہ طلبا کو تحریک دینا بھی اس پروگرام کا ایک مقصد تھا۔ سابق فارغین نے اس موقع پر جو تقریریں کیں وہ نہ صرف تحریکا تھیں بلکہ اس دور میں جو اقدار ان کی زندگی کا حصے بنے ان کی اہمیت بھی اجاگر کر رہی تھیں۔ شجرکاری مہم کے بعد اسکول کے ہال میں ثقافتی پروگرام اور ٹیلنٹ ایوارڈ تقریب بھی منعقد ہوئی۔ جے ایس ایس ایس کے پرنسپل ڈاکٹر محمد ارشد خان نے ون مہتسو کی اہمیت پر زور دیا اور طلبا میں ماحولیاتی بیداری پیدا کرنے کے سلسلے میں اس کے رول کی اہمیت و وقعت کو بھی بتایا۔ پرنسپل نے شجرکاری مہم میں سرگرم حصہ داری کے لیے طلبا اور اساتذہ کی کوششوں کی تعریف کی اور ساتھ ہی ماحولیاتی پایہ داری کے تئیں اسکول کے عہد کو بھی اجاگر کیا۔

پروگرام میں انعامات کی تقسیم اور اسکول کا ترانہ بھی شامل تھا۔ وہ طلبا جنہوں نے اسکول کی سرگرمیوں میں انعامات حاصل کیے تھے، اولمپیاڈ اور دسویں جماعت کے ٹاپرز تھے انہیں تصدیق ناموں کے ساتھ ساتھ ٹرافیاں بھی دی گئیں۔ قابل ذکر ہے کہ اس اسکول کے ٹاپرز کو الیکا فاؤنڈیشن اینڈ ہیلتھ سوسائٹی، دہلی کی جانب سے لیپ ٹاپ، اسمارٹ فون، نقد رقم کی سوغات دی گئی۔ ہمدرد یونیورسٹی، دہلی کی جانب سے انٹر اسکول نعت خوانی مقابلے میں اس اسکول کے دو طلبا نے دوم اور سوم پوزیشن حاصل کی تھی۔

شجرکاری مہم، تحریکاتی تقاریر اور اسکول ترانہ کی مدد سے پروگرام نے ماحولیات کے تئیں طلبا میں ذمہ داری کا احساس پیدا کیا اور ہر ایک فرد کی اس بات کے لیے حوصلہ افزائی کی کہ وہ قدرت و فطرت کے تحفظ میں اپنا رول اداکرے۔ اسکول کو توقع ہے کہ ون مہتسو کی روح مستقبل میں ماحولیات کے تحفظ کے لیے طلبا اور برادری کو تحریک دیتی رہے گی۔