'اساتذہ کی بھرتی بدعنوانی معاملے پر اترپردیش حکومت جواب دے'

کانگریس جنرل سکریٹری پرینکا گاندھی نے اساتذہ بدعنوانی معاملے میں اترپردیش حکومت کو کٹگھرے میں کھڑا کرتے ہوئے کہا کہ 'یہ بڑی بدعنوانی حکومت کی ساز باز سے ہوئی ہے اور اس میں لاکھوں نوجوانوں کے مستقبل کو داؤ پر لگا دیا گیا ہے۔ اس لیے یوگی حکومت کو اس بارے میں جواب دینا پڑے گا۔

اترپردیش کے کانگریس کی انچارج جنرل سکریٹری پرینگا گاندھی نے جمعرات کو ٹویٹ کرکے الزام لگایا کہ یہ بدعنوانی حکومت کی ناک کے نیچے ہوئی اور اسے دبا کر رکھا گیا ہے۔ پرینکا گاندھی کا ماننا ہے کہ افسران کی ساز باز کے بغیر اتنی بڑی بدعنوانی نہیں ہوسکتی۔ اس لئے ریاستی حکومت کو اس سلسلے میں اٹھنے والے سوالوں کا جواب دینا چاہیے۔

انہوں نے ٹوئٹ کیا کہ 'لاکھوں نوجوانوں نے امتحان دیا ہے۔ لاکھوں نے نوکری کی امید لگائی۔ لاکھوں نے سال بھر انتطا کیا۔ بی جے پی حکومت کی ناک کے نیچے سسٹم میں بیٹھے لوگوں کی ساز باز سے مہا گھوٹالہ ہوتا رہا۔ سال بھر اسے دبائے رکھا گیا۔ اب حکومت کو امتحان میں شامل ہوئے محنتی طلبا اور کامیاب ہوئے لوگوں کو جواب دینا ہی ہوگا۔