اقوام متحدہ 400 ویں ’پرکاش پرو‘ کو عالمی انسانی حقوق کا سال قرار دے

شرومنی گرودوارہ منتظمہ کمیٹی کی صدر بی بی جاگیر کور نے اقوام متحدہ کو خط لکھ کر گرو تیغ بہادر جی کی 400 ویں ’پرکاش پرو‘ سنہ 2021 کو عالمی انسانی حقوق کا سال قرار دینے کا مطالبہ کیا ہے۔

بی بی جاگیر کور نے منگل کے روز اقوام متحدہ کے سکریٹری جنرل اینٹونیو گٹریس کو خط لکھ کر کہا کہ نوویں بادشاہ جی نے انسانیت کی خاطر اپنی قربانی دے کر دنیا کی مذہبی تاریخ میں انمٹ چھاپ چھوڑی ہے۔ گرو صاحب کی شہادت مذہبی آزادی کو زندہ رکھنے کے لیے بڑی اہمیت کی حامل ہے جس نے پوری دنیا کو انسانی حقوق کے تحفظ اور مذہبی آزادی کو یقینی بنائے رکھنے کی ترغیب دی۔ انہوں نے کہا کہ گرو صاحب نے انسانی مساوات اور بھائی چارے کی یکجہتی کے لیے جو راستہ دکھایا وہ پوری دنیا کی قیادت کرنے والا ہے۔

ایس جی پی سی صدر نے کہا کہ گرو تیغ بہادر صاحب جی کا 400 واں پرکاش پرو یکم مئی کو منایا جا رہا ہے جس کے پیش نظر پورے سال ملک اور بیرون ملک میں تقریبات کی جائیں گی لہٰذا 400 ویں پرکاش پرو کے سال 2021 کو عالمی انسانی حقوق کے سال کے بطور منایا جائے۔