مرکزی وزیر داخلہ امت شاہ نے سابق صدر پرنب مکھرجی کے انتقال پر گہرے رنج و غم کا اظہار کیا ہے۔
انہوں نے اپنے ٹوئٹ پیغام میں کہا کہ 'سابق صدر اور بھارت رتن پرنب مکھرجی کے انتقال سے گہرا دکھ پہنچا ہے۔ وہ ایک بہت ہی تجربہ کار رہنما تھے جنہوں نے پوری لگن کے ساتھ ملک کی خدمت کی۔ پرنب دا کا ممتاز کیریئر پورے ملک کے لے باعث فخر ہے'۔
وہیں لوک سبھا اسپیکر اوم برلا نے سابق صدر جمہوریہ پرنب مکھرجی کے انتقال پر تعزیت کا اظہار کیا۔
مسٹر برلا نے اپنے پیغام میں کہا کہ 'بھارت رتن سابق صدر پرنب مکھرجی کی موت پر تعزیت کا اظہار کرتا ہوں۔ اپنی پانچ دہائیوں سے زیادہ کی عوامی زندگی میں انہوں نے ملک کے لیے مثالی خدمات انجام دیں۔ پارلیمانی اور انتظامی شعبے میں ان کا تجربہ بے مثال تھا جو ان کے طرز عمل سے صاف ظاہر ہوتا ہے'۔
بھارت رتن اور سابق صدر اور اپنے والد پرنب مکھرجی کے انتقال پر ان کی بیٹی شرمشٹھا مکھرجی نے ایک جذباتی پیغام میں کہا کہ میں آپ کی بیٹی کے طور پر پیدا ہونے کو اپنی خوش قسمتی سمجھتی ہوں۔
محترمہ مکھرجی نے اپنے ٹوئٹ پر والد پرنب مکھرجی کی فوٹو شیئر کرتےہوئے جذباتی ٹوئٹ میں لکھا ’میں سب کو سلام پیش کرتی ہوں۔ بابا آپ کے پسندیدہ شاعر کے شعروں کے ذریعہ سب کو آپ کا آخری الوداع کہہ رہی ہوں۔ آپ نے ملک کی خدمت کے لئے زندگی گذاری۔ آپ کی بیٹی کے طور پر پیدا ہونا میری لیے خوش قسمتی کی بات ہے'۔