ٹرین کی زد میں آنے سے تین نوجوان ہلاک

گریٹر نوئیڈا میں ریلوے ٹریک پر بیٹھ کر موبائل گیم کھیل رہے تین نوجوان ٹرین کی زد میں آگئے جس کی وجہ سے ان کی موت ہوگئی۔

قومی دارالحکومت دہلی سے متصل صنعتی شہر گریٹر نوئیڈا کے گاؤں بوڑاکی میں دہلی ۔ ہاوڑہ ریلوے ٹریک پر بیٹھے ہوئے تین نوجوان موبائل میں گیم کھیل رہے تھے۔

یہ نوجوان موبائل گیم میں اس قدر محو ہو گئے تھے کہ انہیں ٹرین کی آمد کا احساس بھی نہیں ہوا اور ٹرین تینوں کو روندتے ہوئے آگے نکل گئی۔

واضح رہے کہ یہ رات کا واقعہ ہے، جب بوڑاکی کے رہائشی پپو بھاٹی کے دو بڑے بیٹے جیتو اور دیپک اپنے دوست سونو کے ساتھ ریلوے ٹریک پر بیٹھے موبائل گیم کھیل رہے تھے۔

یہ تینوں نوجوان پٹری پر بیٹھے تھے، کہا جاتا ہے کہ ٹرین ڈرائیور نے پٹری پر بیٹھا دیکھ کر ہارن بجانا شروع کیا، جس کا کچھ بھی اثر نہیں ہوا اور ٹرین تینوں کے اوپر سے گزر گئی۔

واضح رہے کہ تینوں نوجوان موقع پر ہی دم توڑ دیے، تینوں نوجوانوں کی عمر 18 سے 20 برس کے درمیان تھیں، جبکہ رات میں تینوں کی آخری رسومات بھی ادا کر دی گئی۔

یہ اس لیے کیا گیا تھا کہ ریلوے پولیس ہلاک ہونے والے افراد کے لواحقین کے خلاف مقدمہ نہ درج کرسکے۔