یو اے پی اے کے الزام میں گرفتار جامعہ کے طالب علم کو امتحان دینے کے لیے عدالت نے اجازت دی

دہلی کی پٹیالہ کورٹ نے یو اے پی اے کے الزام میں گرفتار جامعہ ملیہ اسلامیہ کے الیکٹریکل انجینئرنگ کے ایک 22 سالہ طالب علم کو تہاڑ جیل میں یونیورسٹی کے مقرر کردہ امتحانی شیڈول کے مطابق امتحان دینے کی اجازت دی۔ The court allowed the university student arrested on the charge of UAPA to take the exam

نئی دہلی:پٹیالہ ہاؤس کورٹس کے پرنسپل ڈسٹرکٹ اینڈ سیشن جج سنجے گرگ نے محمد محسن
احمد کو راحت دی۔ محسن احمد کو نیشنل انویسٹی گیشن ایجنسی (این آئی اے) نے گزشتہ برس اوکھلا کے بٹلہ ہاؤس علاقہ سے گرفتار کیا تھا۔ این آئی اے کو یہ اطلاع ملی تھی کہ محسن احمد آئی ایس آئی ایس کے لیے فنڈز اکٹھا کرنے میں سرگرم ہے۔ اسی الزام کے تحت اسے گرفتار کیا گیا تھا۔ محسن احمد نے عدالت سے بی ٹیک کے لیے ساتویں سمسٹر کا امتحان لکھنے کی اجازت مانگی تھی جس پر سماعت کرتے ہوئے درخواست کو منظور کر لیا گیا۔ محسن احمد جامعہ ملیہ اسلامیہ میں (الیکٹریکل انجینئرنگ) کا طالب علم ہے۔

جامعہ ملیہ اسلامیہ کے لیے پیش ہونے والے وکیل نے عدالت کے سامنے کہا کہ یونیورسٹی مقررہ امتحانی شیڈول کے مطابق امتحان کے انعقاد کے دوران اہلکاروں کو جیل کمپلیکس میں تعینات کرے گی۔ جس کے لیے عدالت نے ہدایت دی کہ یونیورسٹی کا ایک مجاز تفتیش کار، جس کی سند تہاڑ جیل سپرنٹنڈنٹ کے ساتھ شیئر کی جائے گی، مقررہ تاریخوں یعنی 08 دسمبر، 11 دسمبر، 13 دسمبر، 15 دسمبر، 18 دسمبر اور 20 دسمبر کو جیل کا دورہ کرے۔ عدالت نے کہا، ’’جیل سپرنٹنڈنٹ اس بات کو یقینی بنائے کہ درخواست دہندہ/ملزم کو امتحان میں شرکت کے لیے سہولت فراہم کرنے کے انتظامات ایسے کمرے یا لائبریری میں کیے جائیں جہاں مکمل امن اور سازگار ماحول ہو۔‘‘

این آئی اے نے یہ ایف آئی آر گزشتہ بارہ جون میں مرکزی وزارت داخلہ ایم ایچ اے کو موصول ہونے والی معلومات کی بنیاد پر درج کی تھی۔ جس میں کہا گیا تھا کہ کچھ ادارے آئی ایس آئی ایس کی دہشت گردانہ سرگرمیوں کو آگے بڑھانے کے لیے ملک کے مختلف حصوں سے کام کر رہے ہیں۔ ایجنسی نے الزام لگایا تھا کہ اس مذموم منصوبہ کو عملی جامہ پہنانے کے لیے سائبر اسپیس پر ایک منظم مہم چلائی گئی تھی جس میں زمینی دہشت گردی کی مالی معاونت کی سرگرمیوں کی مدد کی گئی تھی۔ محسن احمد اس معاملہ میں واحد ملزم ہیں، جنہیں گرفتار کر کے اس معاملے میں چارج شیٹ کی گئی ہے۔

ان کے خلاف انڈین پینل کوڈ 1860 کی دفعہ 153 اے اور 153 بی اور یو اے پی اے کی دفعہ 18، 18 بی، 38، 39 اور 40 کے تحت ان کے خلاف جنوری میں چارج شیٹ داخل کی گئی تھی۔ این آئی اے نے الزام لگایا ہے کہ محسن احمد، عمارہ نامی ایک آن لائن ادارے کی ہدایت پر، ہندوستان میں آئی ایس آئی ایس کے لیے فنڈ اکٹھا کرنے میں ملوث تھا اور مذکورہ ادارے سے رابطہ میں تھا۔ درخواست ایڈووکیٹ تمنا پنکج، پریا وتس اور احمد ابراہیم نے داخل کی تھی۔ ایس پی پی شلپا سنگھ این آئی اے کی طرف سے پیش ہوئیں۔ جب کہ جامعہ ملیہ اسلامیہ کے اسٹینڈنگ وکیل ایڈووکیٹ پریتش سبھروال یونیورسٹی کی طرف سے پیش ہوئے۔