نئی دہلی: ٹاٹا پاور دہلی ڈسٹری بیوشن لمیٹڈ نے 22 جنوری کو خصوصی 'لوک عدالت' منعقد کرنے کا اعلان کیا ہے۔ اس کا اہتمام ٹی پی ڈی ڈی ایل، ای پی سی آفس، سیکٹر-3، روہنی میں کیا جائے گا۔ یہ بات قابل ذکر ہے کہ ٹاٹا پاور دہلی ڈسٹری بیوشن لمیٹڈ نے، جو ایک سرکردہ پاور یوٹیلیٹی ہے اور دارالحکومت میں شمال اور شمال مغربی دہلی کی تقریباً 70 لاکھ آبادی کو بجلی فراہم کرتی ہے، دہلی اسٹیٹ لیگل سروسز اتھارٹی (ڈی ایس ایل ایس اے) کے ساتھ مل کر بجلی صارفین کے مختلف مسائل کو حل کرنے کے لیے اس لوک عدالت کا انعقاد کیا ہے۔ لوک عدالت میں بجلی چوری اور کنکشن منقطع ہونے کے مقدمات کی سماعت کے بعد صارفین کو فوری راحت مل سکتی ہے۔
لوک عدالت میں حصہ لینے کے لیے، صارفین کو 19124 پر کال کرکے یا ٹاٹا پاور کو ای میل بھیج کر پہلے سے خود کو رجسٹر کرنا ہوگا۔اس لوک عدالت میں ایسے معاملات پر غور کیا جائے گا جو کسی بھی عدالت میں زیر التوا ہیں یا جو اب تک کسی عدالت میں دائر نہیں ہوئے ہیں۔ بجلی چوری کے معاملات کے تصفیہ کے خواہشمند صارفین لوک عدالت میں ذاتی طور پر یا اپنے مجاز نمائندے کے ذریعے (اتھارٹی لیٹر کے ساتھ) شرکت کر سکتے ہیں۔ بجلی چوری کے مقدمات کے ازالے کے خواہشمند صارفین اس موقع سے فائدہ اٹھا کر اپنے زیر التواء مقدمات کو جلد اور تسلی بخش طریقے سے حل کر سکتے ہیں۔ لوک عدالت کو کامیاب بنانے کے لئے ٹاٹا پاور دہلی ڈسٹریبیوشن لمیٹڈ اپنے تمام صارفین کو مختلف مواصلاتی وسائل سے معلومات دے رہا ہے۔