' چین سرحد پر کشیدگی کی صورتحال سے آگاہ کرے حکومت'

مرکز کے زیر انتظام علاقے لداخ کے مشرقی علاقے میں موجود گلوان ویلی میں ان دنوں بھارت اور چین کے مابین کشیدگی جاری ہے۔

کانگریس نے چین سرحد پر بھارتی علاقہ میں چینی فوج کی دراندازی پر گہری تشویش کا اظہار کرتے ہوئے کہا کہ حکومت کو وہاں کی حقیقی صورت حال سے ملک کو آگاہ کرنا چاہئے نیز اس معاملے پر عوام اور اپوزیشن جماعتوں کو اعتماد میں لینا چاہئے۔

کانگریس محکمہ مواصلات کے سربراہ رندیپ سنگھ سورجے والا نے پیر کو پریس کانفرنس میں کہا کہ سکیورٹی ماہرین کا خیال ہے کہ
اگر چینی فوج نے سچ میں لداخ کے گلوان ویلی اور پیگینگ علاقہ میں قبضہ کیا ہے تو یہ ملک کی حفاظت کے لئے شدید بحران ہے کیونکہ اس راستے کے ذریعہ سرحد پر تعینات ہندوستانی فوج کے لئے رسد پہنچائی جاتی ہے اس لئے یہ علاقہ اسٹریٹجک نقطہ نظر سے بہت اہم ہے۔

انہوں نے کہا کہ حکومت کو بتا ناچاہئے کہ کیا حقیقی معنوں میں سرحدی حصوں میں چین کی فوج نے دراندازی کی ہے اور اگر یہ خبر صحیح ہے تو حکومت کو اس بارے میں ملک کو حقیقت سے آگاہ کرنا چاہئے۔

کانگریس رہنما نے نیپال کے ساتھ سرحدی تنازعہ کے تعلق سے پوچھے گئے سوال پرکہا کہ یہ تنازعہ سب سے زیادہ تشویش کا باعث ہے اور انہیں امید ہے حکومت اس مسئلے کا حل نکالے گی۔