فلمساز سندیپ سنگھ کے ساتھ گجرات حکومت نے 177 کروڑ کا معاہدہ کیا تھا: کانگریس

اداکار سوشانت سنگھ راجپوت کی موت اور اس سے متعلق منشیات کے معاملات میں سی بی آئی سمیت مختلف تفتیشی ایجنسیوں کی جانچ کے درمیان اہم اپوزیشن کانگریس پارٹی نے اس معاملے میں مبینہ طور پر شک کے دائرے میں آئے فلمساز سندیپ سنگھ کی حکمران بھارتیہ جنتا پارٹی کے لیڈروں سے تعلقات کے سلسلہ میں سوالات اٹھائے ہیں۔

پارٹی کے گجرات کے ریاستی ترجمان منیش دوشی نے آج یہاں پریس کانفرنس میں سندیپ کی کمپنی لیجنڈ گلوبل اور گجرات سرکار کے محکمہ سیاحت کے مابین گذشتہ سال وائبرنٹ گجرات سمٹ کے دوران ہوئے 177 کروڑ ایم او یو کی کاپی اور اس وقت کے بی جے پی صدر امت شاہ اور مرکزی وزیر نتن گڈکری، سابق وزیراعلی دیویندر پھڑنویس کے ساتھ ان کی تصاویر کی کاپی جاری کرتے ہوئے کہا کہ بی جے پی سندیپ کے ساتھ اپنے بڑے لیڈروں کے تعلقات پر خاموشی کیوں ہے۔

منیش دوشی نے کہا کہ گجراتی فلمی صنعت اور فنکاروں کو نظرانداز کرنے والی ریاست کی بی جے پی حکومت کے محکمہ سیاحت نےاس وقت 6 لاکھ کے خسارے والی سندیپ کی کمپنی کے ساتھ 177 کروڑ روپے کا معاہدہ کیوں کیا۔ انہوں نے کہا کہ اس کمپنی میں محض تین دن کے لئے اداکار وویک اوبرائے ڈائریکٹر بھی بنے تھے۔