SC on VHP Rallies in Delhi سپریم کورٹ نے وی ایچ پی کی ریلیوں پر پابندی لگانے سے انکار کیا

ہریانہ کے نوح اور گروگرام میں فرقہ وارانہ فساد کے بعد دہلی این سی آر کے علاقہ میں وشو ہندو پریشد اور بجرنگ دل کی جانب سے مجوزہ ریلی کو روکنے کے لیے سپریم کورٹ میں ایک درخواست داخل کی گئی تھی جس پر سپریم کورٹ نے وشو ہندو پریشد اور بجرنگ دل کی ریلیوں پر پابندی لگانے سے انکار کر دیا ہے۔ VHP Rallies in Delhi

نئی دہلی: سپریم کورٹ نے وشو ہندو پریشد اور بجرنگ دل کی ریلیوں پر پابندی لگانے سے انکار کر دیا ہے۔ یہ ریلی ہریانہ کے نوح میں تشدد کے خلاف دہلی کے تقریباً 25 مختلف علاقوں میں بلائی گئی ہے۔ سپریم کورٹ میں ایک درخواست کے ذریعے ان ریلیوں پر پابندی لگانے کا مطالبہ کیا گیا تھا۔ سپریم کورٹ نے درخواست کی سماعت کرتے ہوئے ہدایت کی کہ اس بات کا خیال رکھا جائے کہ ریلی میں کوئی 'نفرت انگیز تقریر' نہ ہو۔
یہ بھی پڑھیں:

سپریم کورٹ نے ہریانہ، اتر پردیش اور دہلی کو جہاں ضروری ہو وہاں اضافی پولیس فورس تعینات کرنے اور ریلیوں کی ویڈیو گرافی کرنے کی ہدایت دی۔ ہریانہ کے نوح میں پیر کو دو مذاہب کے درمیان تصادم اور تشدد ہوا تھا۔ اس کے بعد آس پاس کے اضلاع میں بھی کشیدگی کی صورتحال پیدا ہوگئی۔ ہریانہ کے وزیر اعلیٰ منوہر لال کھٹر نے پیر کو کہا کہ تشدد میں اب تک چھ لوگوں کی موت کی تصدیق ہو چکی ہے۔ ہریانہ کے ڈی جی پی، پی کے اگروال نے ایک پریس کانفرنس میں بتایا کہ ریاست میں حالات قابو میں ہیں اور اس معاملے میں درج تمام معاملات کی جانچ ایس آئی ٹی کے ذریعے کی جارہی ہے۔

واضح رہے کہ قبل ازیں ہریانہ ریاست کے گروگرام اور نوح میں فرقہ وارانہ فساد کے تناظر میں دہلی این سی آر علاقہ میں بجرنگ دل اور وشو ہندو پریشد کی جانب سے نکالی جانے والی ریلی کو روکنے کے لیے سپریم کورٹ میں ایک درخواست داخل کی گئی تھی۔ یہ درخواست نفرت انگیز تقریروں سے متعلق زیر التوا رٹ پٹیشن میں انٹرلوکیوٹری ایپلی کیشن کے طور پر داخل کی گئی تھی۔ سینئر ایڈووکیٹ چندر اُدے سنگھ نے جسٹس انیرودھ بوس کے سامنے فوری فہرست سے پہلے درخواست کا ذکر کیا تھا۔ کیونکہ چیف جسٹس آف انڈیا اور اگلے چار سینئر جج آرٹیکل 370 کیس کی سماعت کے لیے آئینی بنچ میں بیٹھے ہیں۔