جسٹس ارون مشرا اور جسٹس اندرا بنرجی کی بنچ نے منوہر لال شرما کی جانب سے دائر کی گئی عرضی پر سماعت کرنے سے انکار کردیا ہے۔
جسٹس مشرا نے کہا کہ ’’یہ قانون کے نفاذ کا معاملہ ہے اور ہم دہلی میں نافذ قومی سلامتی قانون کو ہٹانے کے سلسلے میں حکومت کو کسی طرح کا حکم نہیں دے سکتے۔‘‘
دہلی کے لفٹننٹ گورنر انل بیجل کی جانب سے جاریہ ماہ ایک نوٹیفیکیشن جاری کرکے قومی سلامتی قانون کے تحت دہلی پولس کمشنر کو کسی شخص کو حراست میں لینے کا اختیار دیا تھا۔
قومی سلامتی قانون کے تحت کسی بھی شخص کو شک کی بنیاد حراست میں لیا جاسکتا ہے۔
دہلی کے لفٹننٹ گورنر نے 19 جنوری سے 18 اپریل تک اپنے اختیارات کا استعمال کرتے ہوئے قومی سلامتی قانون 1980 کی دفعہ تین کی ذیلی دفعہ کو دہلی میں نافذ کردیا ہے جس کے تحت دہلی پولیس کمشنر کو کسی بھی شخص کو حراست میں لینے کا اختیار حاصل ہوگیا ہے۔