کانگریس کا اہم اجلاس،اختلاف رکھنے والے 23 رہنما شرکت کریں گے

کانگریس کے سینئر ناراض رہنماؤں اور عبوری پارٹی کے سربراہ سونیا گاندھی کے درمیان اہم اجلاس آج ان کی رہائش گاہ پرمنعقد ہوگا جس میں سابق وزیراعظم منموہن سنگھ اور پارٹی کے سابق سربراہ راہل گاندھی بھی شرکت کریں گے۔

23 اعلی رہنماؤں کی جانب سے سونیا گاندھی کو پارٹی میں اصلاحات کرنے کے مطالبہ کے بعد ان کے مابین منظم اجلاس کا یہ پہلا موقع ہے۔

اس ملاقات کو متحارب گروپز کے درمیان "مفاہمت" کی طرف پیش قدمی کے طور پر دیکھا جا رہا ہے ، جنھیں مبینہ طور پر پارٹی کے سربراہ سے ملاقات کا موقع نہیں دیا گیا تھا۔

ذرائع کا کہنا ہے کہ پرینکا گاندھی نے اس معاملے میں پیشقدمی کی ہے۔ انھوں نے قیادت، دیگر افراد اور تنقید کرنے والے گروپز کے مابین برف کو توڑنے کے لئے سینئر رہنما کمل ناتھ کو اعتماد میں لیا۔

سونیا ، منموہن سنگھ اور راہول گاندھی کے علاوہ ، اے کے انتونی ، پی چدمبرم ، غلام نبی آزاد ، آنند شرما ، ششی تھرور ، بھوپندر ہوڈا ، پرتھوی راج چوہان سمیت متعدد سینئر رہنما اجلاس میں شریک ہوں گے۔

مدھیہ پردیش کے سابق وزیر اعلی کمل ناتھ اور پارٹی کے جنرل سکریٹری پریانکا گاندھی واڈرا بھی اس اجلاس میں شریک ہوں گے۔

جمعرات کو پارٹی ذرائع نے بتایا کہ کمل ناتھ کو جی 23 رہنماوں اور عبوری چیف سونیا سے ملاقات کا نظم کرنے کے کی ذمہ داری سونپی گئی ہے۔

واضح رہے کہ اس برس اگست میں 23 سینئر رہنماؤں نے سونیا گاندھی سے کانگریس میں فعال قیادت کا مطالبہ کیا تھا۔