دہلی پولیس شلپا اور راج کندرا کے خلاف ایکشن ٹیکن رپورٹ داخل کرے: عدالت

روہنی کورٹ نے دہلی پولیس کو ہدایت دی ہے کہ وہ فلم اداکارہ شلپا شیٹی اور ان کے شوہر راج کندرا کے خلاف ایک ایکشن ٹیکن رپورٹ داخل کریں۔

دہلی کی روہنی کورٹ نے دہلی پولیس کو ہدایت دی ہے کہ وہ فلم اداکارہ شلپا شیٹی اور ان کے شوہر راج کندرا کے خلاف فحش فلم بنانے کے لیے سرمایہ کار کے پیسوں کا استعمال کرنے کے الزام میں ایکشن ٹیکن رپورٹ داخل کریں۔ میٹروپولیٹن مجسٹریٹج مانسی ملک نے آئندہ سماعت 9 نومبر کو کرنے کا حکم دیا۔

یہ درخواست آرٹیک بلڈرز کے پارٹنر وشال گوئل نے دائر کی ہے۔ اس عرضی میں کہا گیا کہ راج کندرا اور شلپا شیٹی نے ایک سازش کے تحت اپنی کمپنی ویان انڈسٹریز کا خواب دکھا کر ان سے سرمایہ کاری کرنے کو کہا۔اس عرضی میں الزام لگایا گیا ہے کہ شلپا شیٹی اور راج کندرا نے کہا کہ ان کے پاس اینیمیشن ، گیمنگ ، لائسنسنگ ، ٹیکنالوجی اور بیوٹی پروڈکٹس کا کاروبار ہے۔

اس کے علاوہ عرضی میں کہا گیا ہے کہ عرضی گزار نے لالچ میں آکر شلپا شیٹی اور راج کندرا کی کمپنی میں 41 لاکھ روپے کی سرمایہ کاری کی ہے۔ لیکن بعد میں انہیں معلوم ہوا کہ ملزم نے اسے دھوکہ دیا ہے اور اس کے پیسے کا استعمال فحش فلمیں بنانے کے لیے کیا ہے۔عرضی گزار کو اس دھوکہ دہی کی اطلاع خبروں سے ملی کہ ملزمین نے سرمایہ کاروں کو دھوکہ دیا ہے۔

درخواست میں جعل سازی اور مجرمانہ سازش کا الزام لگاتے ہوئے ملزم کے خلاف ایف آئی آر درج کرنے کا حکم دینے کا مطالبہ کیا گیا ہے۔