شیلا اور ماکن نے کاغذات نامزدگی داخل کیے

دہلی کی سابق وزیراعلی شیلا دکشت اور ریاستی کانگریس کے سابق صدر اجے ماکن نے آج لوک سبھا الیکشن کے لیے اپنے اپنے کاغذات نامزدگی داخل کیے۔

ریاستی کانگریس کے صدر اور تین مرتبہ دہلی کی وزیر اعلی رہ چکیں محترمہ دکشت نے شمال مشرقی دہلی سے نامزدگی داخل کی۔ یہاں ان کا مقابلہ بی جے پی کے ریاستی صدر منوج تیواری اور عام آدمی پارٹی کے دلیپ پانڈے سے ہوگا۔

ماکن نے نئی دہلی پارلیمانی سیٹ سے نامزدگی داخل کی ہے ۔ بی جے پی نے اس سیٹ پر موجودہ رکن پارلیمنٹ میناکشی لیکھی کو اتارا ہے جب کہ برجیش گوئل عام آدمی پارٹی کے امیدوار ہیں۔

خیال رہے کہ کانگریس نے سابق ریاستی صدر اروند ر سنگھ لولی کو مشرقی دہلی، مہابل مشرا کو مغربی دہلی اور شمال مغربی دہلی سے ریاست کے کارگذار صدر راجیش للوٹھیا کو اتارا ہے۔ پارٹی نے جے پرکاش اگروال کو چاندنی چوک سے ٹکٹ دیا ہے۔ جنوبی دہلی سے کانگریس نے اولمپک گولڈ میڈلسٹ باکسر راجندر سنگھ کو میدان میں اتارا ہے۔