Shahi Imam عیدالاضحی پر شرپسندوں پر لگام لگانے کا سرکار سے مطالبہ

شاہی امام مسجد فتح پوری مولانا مفتی محمد مکرم احمد نے جمعہ کی نماز سے قبل خطاب میں کہا کہ ملک کے کچھ علاقوں میں شرپسند عناصر سرگرم ہوگئے ہیں، یہ بہت افسوس کی بات ہے۔

نئی دہلی:قومی دارالحکومت دہلی میں واقع شاہی امام مسجد فتح پوری کے مولانا مفتی محمد مکرم احمد نے کہا کہ ہریدوار میں کچھ لوگوں کا قربانی کے خلاف زہر افشانی کرتے ہوئے ویڈیو وائرل ہو رہا ہے۔ وہیں دوسری جانب عید الاضحی پر قربانی کرنے اور بکرا منڈی لگانے پر مسلمانوں کے خلاف دہلی جنوبی زون کے ایم سی ڈی کے ویٹرنری سروسز کے ڈپٹی ڈائریکٹر نے دہلی پولیس کو خط لکھ کر سخت قانونی کارروائی کرنے کو کہا ہے۔

مفتی مکرم نے حکومت سے پر زور مطالبہ کیا کہ بھارت کی آزادی سے قبل بعد میں ہر سال عیدالاضحی منائی جاتی آ رہی ہے تو اب ایسی کیا پریشانی ہے، انہوں نے اپیل کی ہے کہ نماز اور قربانی میں فساد پھیلانے والوں پر سخت کارروائی کی جائے۔ انہوں نے مسلمانوں سے اپیل بھی کی ہے کہ سنجیدگی، صبر و تحمل کے ساتھ عید الاضحی کی نماز ادا کریں اور قربانی کا فریضہ انجام دیں۔ علاقہ کے ذمہ داران اور پولیس کی صلاح و مشورہ سے ہر کام کو انجام دیں۔ قربانی کے فوٹو یا ویڈیو نہ بنائیں۔ صفائی ستھرائی کا خیال رکھیں نیز سڑک پر راستہ میں قربانی کے باقیات نہ ڈالیں سرکاری ہدایات پر عمل کریں۔

مفتی مکرم نے لاء کمیشن کے ذریعے یونیفارم سول کوڈ کے مسئلہ کو ایک بار پھر سے زندہ کرنے پر اعتراض جتاتے ہوئے کہا کہ لا کمیشن نے یونیفارم سول کوڈ کا مسئلہ کھڑا کرکے ملک کی عوام کو بے چینی میں مبتلا کر دیا ہے۔ یونیفارم سول کوڈ شریعت میں مداخلت ہے جو ہرگز منظور نہیں ہے۔ لاء کمیشن نے اس بارے میں عوام سے رائے مانگی ہے لہذا لا کمیشن کی ویب سائٹ پر جا کر ۱۳ جولائی سے پہلے اپنا شدید اعتراض داخل کریں اور اس بارے میں دوسروں کی بھی مدد کریں۔