Fire in Sleeper Bus سلیپر بس میں آتشزدگی میں دو افراد ہلاک اور دیگر زخمی

دہلی-گروگرام ایکسپریس وے پر گذشتہ روز رات میں ایک سلیبر بس میں آگ لگنے کا واقعہ پیش آیا جس میں دو مسافر ہلاک اور ایک درجن سے زائد افراد شدید زخمی ہو گئے ہیں۔

گروگرام: دہلی-گروگرام ایکسپریس وے پر بدھ کے روز رات میں سلیپر بس میں آگلگنے کی وجہ سے دو مسافر ہلاک اور ایک درجن سے زائد افراد شدید زخمی ہو گئے ہیں۔ آگ لگنے سے بس مکمل طور پر جل کر خاکستر ہوگئی، فائر ڈپارٹمنٹ کے اہلکاروں کی جانب سے آگ لگنے کی وجہ کا ابھی تک پتہ نہیں چل سکا ہے۔

پولیس کے مطابق زخمیوں میں سے پانچ کو میڈانتا اسپتال میں منتقل کرایا گیا ہے اور باقی سول اسپتال میں زیر علاج ہیں۔ فائر ڈپارٹمنٹ کے ایک سینئر اہلکار نے بتایا کہ دہلی سے جے پور جانے والے مین کیریج وے پر جھارسا فلائی اوور کے قریب رات 8.30 بجے آگ لگنے کی اطلاع ملی کہ رجسٹریشن نمبر AR 01 K 7707 والی ایک سلیپر بس میں کیریج وے پر آگ لگ گئی ہے۔ سینئر عہدیدار نے بتایا کہ "ہمیں اطلاع ملنے کے بعد تین فائر ٹینڈرز کو موقع پر فورا ہی بھیج دیا گیا''۔

آگ پر قابو پانے تک دو مسافر جھلس کر ہلاک ہو گئے۔ اہلکار نے مزید کہا کہ کچھ دیگر مسافر جھلس کر زخمی ہوئے۔ سول اسپتال میں زخمی افراد کا علاج کرنے والے ڈاکٹروں نے تصدیق کی ہے کہ زخمیوں میں سے سات اسپتال میں زیر علاج ہیں۔ ایک ڈاکٹر نے بتایا کہ تمام زخمی افراد 30 سے 50 فیصد جھلس چکے ہیں لیکن ان کی حالت مستحکم ہے۔ اطلاع ملنے پر ڈپٹی کمشنر نشانت کمار یادو اور گروگرام پولیس کمشنر وکاس کمار اروڑہ نے جائے حادثہ کا دورہ کیا اور اس معاملے کی تحقیقات کی۔ پولیس حادثے میں ہلاک ہونے والے افراد کی شناخت کرنے میں مصروف ہے۔