نئی دہلی: وزیر اعظم نریندر مودی ہفتہ کو تقریباً 70,000 نوجوانوں میں ویڈیو کانفرنس کے ذریعے تقرری نامہ تقسیم کیا۔ اس موقعے پر خطاب کرتے ہوئے وزیر اعظم نریندر مودی نے مرکز میں سابقہ یو پی اے حکومت پر طنز کیا۔ انہوں نے کہا کہ یو پی اے حکومت نے "گھپلوں" کے ذریعہ بینکوں کو برباد کر دیا تھا، لیکن ان کی حکومت نے بینکوں کی مالی حالت بحال کی اور بھارت اب اپنے مضبوط بینکنگ سیکٹر کے لیے جانا جاتا ہے۔ ڈیجیٹل طور پر 70،00 سے زیادہ لوگوں کو تقرری نامہ تقسیم کرنے کے بعد اپنے خطاب میں پی ایم مودی نے کہا ان میں سے متعدد نوجوان بینکنگ سیکٹر میں کام کریں گے۔ انہوں نے الزام لگایا کہ ان کی حکومت نے اصلاحی اقدامات کرنے سے پہلے ہی پچھلی حکومت نے بینکنگ سیکٹر کو 'تباہ' کر دیا تھا۔
مودی نے کہا کہ 'فون بینکنگ' گھوٹالہ پچھلی حکومت کے سب سے بڑے گھوٹالوں میں سے ایک تھا، جس کی وجہ سے بینکنگ نظام کی کمر ٹوٹ گئی۔ انہوں نے کہا کہ پچھلی حکومت کے لیے فون بینکنگ کا تصور مختلف تھا، کیونکہ اس وقت ہزاروں کروڑ روپے کے قرضے کچھ سیاست دانوں اور خاندانوں کے پسندیدہ افراد کو دیے گئے تھے اور یہ قرضے واپس کرنے کے لیے نہیں تھے۔ مودی نے کہا کہ ان کی حکومت نے بینک مینجمنٹ کو مضبوط بنانے، چھوٹے بینکوں کو ضم کرنے اور اس شعبے کی مدد کے لیے پیشہ ورانہ ماحول بنانے سمیت کئی اقدامات کیے ہیں۔ انہوں نے کہا کہ پہلے پبلک سیکٹر کے بینک ہزاروں کروڑ کے نقصانات اور نان پرفارمنگ اثاثوں (این پی اے) کے لیے جانے جاتے تھے، لیکن اب وہ ریکارڈ منافع کے لیے جانے جاتے ہیں۔
واضح رہے کہ یہ بھرتیاں مرکزی حکومت کے محکموں کے ساتھ ساتھ ریاستی حکومتوں اور مرکز کے زیر انتظام علاقوں میں کی گئی ہیں۔ اس سے قبل پی ایم او نے کہا کہ ملک بھر سے منتخب ان نوجوانوں کو مختلف عہدوں پر تعینات کیا جائے گا۔ یہ نوجوان مختلف وزارتوں اور محکموں میں کام کریں گے جن میں محکمہ محصولات، محکمہ مالیات، محکمہ ڈاک، محکمہ اسکولی تعلیم، محکمہ اعلیٰ تعلیم، وزارت دفاع، وزارت صحت اور خاندانی بہبود، مرکزی پبلک سیکٹر انڈرٹیکنگز، محکمہ آبی وسائل، محکمہ پرسونل اور ٹریننگ اور وزارت داخلہ شامل ہیں۔