روی داس مندر معاملہ، متعدد گرفتار

قومی دارالحکومت دہلی کے تغلق آباد میں گرو روی داس مندر منہدم کرنے کے بعد تشدد کے واقعات پیش آئے تھے۔

اس سلسلے میں بھیم سینا کے سربراہ چندر شیکھر آزاد سمیت 96 لوگوں کو گرفتار کیا گیا تھا جنہیں آج عدالت نے 14 روز کی عدالتی تحویل میں بھیج دیا ہے۔

یہ مندر سپریم کورٹ کی ہدایت پر منہدم کیا گیا تھا۔ مندر گرانے کے خلاف بھیم سینا کے سربراہ چندر شیکھر کی قیادت میں سینکڑوں کارکنوں نے گذشتہ روز مظاہرہ کیا تھا اور کئی گاڑیوں میں توڑ پھوڑ کی تھی۔
دہلی پولیس نے آزاد اور دیگر کے خلاف گووند پوری تھانہ علاقہ میں تعزیرات ہند کی دفعہ 147, 149, 186, 332 کے تحت معاملہ درج کیا تھا۔ تمام کو آج ساکیت کی عدالت میں پیش کیا گیا جہاں سے انہیں 14دن کی عدالتی تحویل میں بھیج دیا گیا۔
پولیس اور مظاہرین کے مابین تصادم ہوا تھا۔ مظاہرین کو منتشر کرنے کے لیے پولیس کو طاقت کا استعمال اور آنسو گیس کے گولے بھی داغنے پڑے تھے۔ پرتشدد واقعات میں 15 پولیس اہلکار بھی زخمی ہوئے تھے۔
سپریم کورٹ نے 19 اگست کو اپنے حکم میں کہا تھا کہ 'تغلق آباد کے جنگلاتی علاقہ میں واقع گرو روی داس مندر کے سلسلہ میں اس کی ہدایت کو ’سیاسی رنگ‘ نہیں دیا جا سکتا۔ عدالت نے پنجاب، ہریانہ اور دہلی کی حکومتوں سے کہا تھا کہ 'وہ امن و قانون یقینی بنائیں۔'