ریل روکو تحریک پرامن ہوگی: راکیش ٹکیت

وزارت ریلوے نے 12 بجے سے چار بجے تک ریل کی آمد و رفت کو روکنے کا فیصلہ کیا ہے

زرعی قوانین کے خلاف احتجاج کرتے ہوئے متحدہ کسانوں کی تنظیم نے آج ریل روکنے کی اپیل کی ہے۔ اس درمیان کسان رہنما راکیش ٹکیت نے کہا کہ یہ تحریک دوپہر 12 بجے سے شروع ہوگی اور شام 4 بجے تک چلے گی۔ نیز تحریک کے خاکہ کے متعلق انہوں نے کہا کہ تحریک پرامن ہوگی۔

انہوں نے کہا کہ ہم پھنسے ہوئے لوگوں کو پانی، دودھ، لسی اور پھل فراہم کریں گے۔ ہم انہیں اپنی پریشانیوں سے بھی آگاہ کریں گے۔ اسی کے ساتھ ہی اترپردیش حکومت نے تمام ایجنسیوں کو اس تحریک کے بارے میں آگاہ کردیا ہے۔ وزارت ریلوے نے ریلوے پروٹیکشن فورس (آر پی ایف) اور گورنمنٹ ریلوے پولیس (جی آر پی) کو ہائی الرٹ کردیا ہے۔

سینئر عہدیدار ریلوے اسٹیشنوں کا جائزہ لے رہے ہیں اور ان جگہوں کی نشاندہی کر رہے ہیں جہاں سے کسی حد تک خلل پیدا ہونے کا امکان ہے۔ تاہم کسان رہنماؤں کو متنبہ کیا گیا ہے کہ اگر انہوں نے ٹرینوں کو روکنے کی کوشش کی تو ان کے خلاف قانونی کارروائی کی جائے گی۔