اپوزیشن ارکان پارلیمنٹ کی معطلی پر راہل گاندھی کا شدید ردعمل

Rahul Gandhi's strong reaction to the suspension of opposition MPs آج اپوزیشن کے مزید 49 ارکان کو لوک سبھا سے معطل کر دیا گیا۔ ان میں فاروق عبداللہ، ششی تھرور، منیش تیواری شامل ہیں۔ گذشتہ روز پیر کو ریکارڈ 78 ارکان پارلیمنٹ کو معطل کیا گیا تھا۔

دہلی: آج اپوزیشن کے مزید 49 ارکان کو لوک سبھا سے معطل کر دیا گیا۔ ان میں فاروق عبداللہ، ششی تھرور، منیش تیواری شامل ہیں۔ گذشتہ روز پیر کو ریکارڈ 78 ارکان پارلیمنٹ کو معطل کیا گیا تھا۔ گزشتہ دو دنوں میں پارلیمنٹ کے دونوں ایوانوں سے کل 141 ارکان پارلیمنٹ کو معطل کیا گیا۔

اپوزیشن ارکان وزیر داخلہ امت شاہ اور وزیر اعظم نریندر مودی سے پارلیمنٹ کی سیکورٹی میں چوک کے معاملہ پر ایوان میں بیان دینے کا مطالبہ کررہے ہیں۔ کانگریس لیڈر راہل گاندھی نے اس پورے معاملے پر ردعمل ظاہر کیا ہے۔ میڈیا کے سوالات کا جواب دیتے ہوئے راہل گاندھی نے کہا کہ جو کچھ ہو رہا ہے آپ سب دیکھ سکتے ہیں۔ انہوں نے کہا کہ اپوزیشن کا کہنا ہے کہ وزیر داخلہ اور وزیراعظم ایوان کے باہر اس معاملہ پر بیان دے سکتے ہیں تو پھر ایوان میں جواب کیوں نہیں دے رہے ہیں۔

وہیں کانگریس کے جنرل سکریٹری اور رکن پارلیمان رندیپ سنگھ سرجے والا نے کہا کہ ’پارلیمنٹ پر حملے کی برسی پر جس طرح سے مظاہرین پارلیمنٹ میں داخل ہوئے، حالانکہ یہ مظاہرہ بے روزگاری اور اس نظام کے خلاف تھا، لیکن اگر کوئی حملہ ہوتا تو آج ملک کو کن حالات کا سامنا کرنا پڑتا؟ مودی حکومت پارلیمنٹ کی حفاظت نہیں کر سکتی تو ملک کی حفاظت کیا کرے گی۔ انہوں نے یہ بھی کہا کہ اگر مودی حکومت اپوزیشن سے پاک پارلیمنٹ چاہتی ہے تو اسے بی جے پی کے دفتر میں ہی میٹنگ کرنی چاہئے اور ملک کا ایجنڈا طے کرنا چاہئے۔