نئی دہلی: کانگریس 14 جنوری سے منی پور سے ممبئی تک 14 ریاستوں اور 85 اضلاع کا احاطہ کرنے والی "بھارت نیائے یاترا" کا انعقاد کرے گی۔ آل انڈیا کانگریس کمیٹی کے جنرل سکریٹری کے سی وینوگوپال نے اعلان کیا ہے۔ یاترا کا یہ اعلان ناگپور میں منائے جانے والے ملک کی سب سے قدیم پارٹی کے یوم تاسیس کی تقریبات سے ایک دن پہلے سامنے کیا گیا ہے۔
کے سی وینو گوپال نے پریس کانفرنس سے خطاب کرتے ہوئے کہا کہ "کانگریس کی ورکنگ کمیٹی نے رائے دی تھی کہ راہل گاندھی کو مشرق سے مغرب تک یاترا شروع کرنی چاہئے... آل انڈیا کانگریس کمیٹی نے 14 جنوری سے 20 مارچ تک منی پور سے ممبئی تک 'بھارت نیائے یاترا' منعقد کرنے کا فیصلہ کیا ہے"۔
انہوں نے کہا کہ "راہل گاندھی نے کنیا کماری سے کشمیر تک کی بھارت جوڑو یاترا کی قیادت کی تھی جس میں 4,500 کلومیٹر کا سفر طے کیا گیا۔ یہ ہندوستانی سیاسی تاریخ کی ایک تاریخی یاترا تھی۔ وہ اس یاترا کو بھارت جوڑو یاترا کے تجربے کے ساتھ نکالیں گے۔ راہل گاندھی اس یاترا کے دوران ملک کی خواتین، نوجوان اور پسماندہ طبقات کے لوگوں کے ساتھ بات چیت کریں گے۔
وینوگوپال نے یہ بھی کہا کہ یاترا 6,200 کلومیٹر کا فاصلہ طے کرے گی، اور منی پور، ناگالینڈ، آسام، میگھالیہ، مغربی بنگال، بہار، جھارکھنڈ، اڈیشہ، چھتیس گڑھ، اتر پردیش، مدھیہ پردیش، راجستھان اور گجرات سے ہوتی ہوئی مہاراشٹر پہنچے گی۔ انہوں نے کہا کہ "یہ یاترا 14 ریاستوں اور 85 اضلاع کا احاطہ کر رہی ہے۔ بھارت نیائے یاترا کا سفر زیادہ تر بس کے ذریعے کیا جائے گا"۔