کشمیر: میڈیا کی آزادی پر سوال، صحافی تنظیموں میں تشویش

پریس کونسل آف انڈیا نے جموں و کشمیر میں میڈیا کی آزادی پر بندشوں سے متعلق عدالت کو آگاہ کرنے کا فیصلہ کیا ہے۔

صحافی تنظیموں نے آج پریس کونسل آف انڈیا کے کشمیر میں میڈیا پر بندشوں کے معاملے میں سپریم کورٹ منتقل کرنے کے فیصلے کا حوالہ دیتے ہوئے ایک قرار داد منظور کی اور پریس کونسل آف انڈیا کے چیئرمین ریٹائرڈ چیف جسٹس چندرمولی کمار پرساد سے مطالبہ کیا کہ وہ فوری طور پر اپنی مداخلت کو عدالت سے واپس لیں۔

نئی دہلی کے پریس کلب آف انڈیا میں منعقدہ اس میٹنگ میں پریس ایسوسی ایشن، پریس کلب آف انڈیا، ایڈیٹرز گلڈ اور انڈین ویمن پریس کور کی صحافی تنظیمیں موجود تھیں۔

انڈین ویمن پریس کور کے جنرل سکریٹری وینیتا پانڈے نے کہا کہ 'ہم جموں و کشمیر میں میڈیا کی آزادی پر عائد بندشوں کی مذمت کرتے ہیں، جو انہیں اپنے فرائض کی انجام دہی سے روکتی ہے۔'

انہوں نے مزید کہا ،"پی سی آئی کے چیئرمین کا پی سی آئی کی طرف سے مداخلت کے سلسلے میں سپریم کورٹ میں کشمیر ٹائمز کے ایگزیکٹو ایڈیٹر انورادھا بھاسن کی جانب سے دائر درخواست میں ایک طرفہ کارروائی قابل مذمت ہے"۔

سینئر صحافی ارملیش سنگھ نے کہا کہ پی سی آئی چیئرمین کو پی سی آئی کی 28 رکنی کمیٹی کا ہنگامی اجلاس طلب کرنا چاہئے۔اس کے ساتھ ہی انہیں اس معاملے میں سپریم کورٹ میں ان کی طرف سے دائر درخواست کو بھی واپس لینا چاہئے۔

خیال رہے کہ کشمیر ٹائمز کی ایکزیکیٹیو ایڈیٹر انورادھا بھسین کی عرضی پر سماعت کرتے ہوئے سپریم کورٹ نے مرکزی حکومت کو نوٹس جاری کر کے سات دنوں میں جواب دینے کو کہا ہے۔