دہلی پولیس کا قتل کا سات مقدمہ حل کرنے کا دعوی

دہلی پولیس نے حولدار رتن لال سمیت سات قتل کے مقدمات حل کرنے کا دعوی کیا ہے۔ رتن لال قتل کے الزام میں اب تک سات افراد کو گرفتار کیا گیا ہے۔

وہیں پولیس کے مطابق نالے سے ملنے والی چار لاشوں کے معاملے میں چار ملزمان کو گرفتار کیا گیا ہے، انوری بیگم نامی خاتون کے قتل کے الزام میں دو بھائیوں کو گرفتار کیا گیا ہے جبکہ انکیت قتل کیس میں گرفتاری پہلے ہی ہوچکی ہے۔

ڈی سی پی مندیپ سنگھ رندھاوا نے بتایا کہ 'پولیس اب تک قتل کے سات مقدمات حل کرنے میں کامیاب ہوگئی ہے۔ حولدار رتن لال کو 24 فروری کو قتل کیا گیا تھا۔ تفتیش میں اس جگہ پر لگے سی سی ٹی وی کو توڑنے اور پولیس پر حملہ کی سازش کا خلاصہ ہوا تھا۔

تفتیش کرنے والی پولیس ٹیم نے اس معاملے میں سات افراد کو گرفتار کیا ہے۔ ان کی شناخت سلیم ملک عرف مننا، محمد جلال الدین، ​​ایوب، محمد یونس، عارف، محمد دانش اور محمد سلیم کے نام سے ہوئی ہے۔ دانش یوپی کے لونی کا رہائشی ہے۔

گزشتہ 27 فروری کو گوکل پوری میں واقع بھگیرتھی وہار کے نالے سے چار لاشیں برآمد ہوئی تھی ان چاروں کے قتل میں پنکج شرما، لوکیش، سمت اور انکیت کو گرفتار کیا گیا ہے۔

وہیں 25 فروری کو بھجن پورہ کے علاقے میں ایک مکان کو سی اے اے کے حامیوں نے نذر آتش کردیا۔ اس آگ میں پھنسے بہت سے لوگوں کو بحفاظت نکال لیا گیا۔ لیکن اندر موجود 85 سالہ اکبری بیگم کی دم گھٹنے کی وجہ سے موت ہو گئی۔

اس معاملے میں انسپکٹر پنکج اروڑا کی ٹیم نے ارون اور ورون نامی دو بھائیوں کو گرفتار کیا ہے۔