وزیر اعظم نے جھوٹ بولا، ان پر بھروسہ نہیں: عمر خالد

جے این یو کے سابق طالب علم اور سماجی کارکن عمر خالد نے ای ٹی وی بھارت سے خصوصی گفتگو کے دوران کہا کہ وزیر اعظم نریندر مودی جھوٹے ہیں۔

ای ٹی وی بھارت سے خصوصی بات چیت کے دوران عمر خالد نے شہریت ترمیمی قانون اور این آر سی پر وزیر اعظم نریندر مودی کے رام لیلا میدان میں دیے گئے بیان پر کہا کہ 'وزیر داخلہ این آر سی کے نفاذ کا اعلان پارلیمنٹ میں کر چکے ہیں، اس کا مطلب یا تو وزیر داخلہ جھوٹ بول رہے ہیں یا خود وزیر اعظم۔

عمر خالد نے اترپردیش میں مظاہرین کی موت اور ہزاروں حراستوں پر کمیشن تشکیل دینے کا مطالبہ بھی کیا۔ انہوں نے کہا یوگی حکومت کے مظالم کی انکوائری ہونی چاہئے۔

عمر خالد نے مزید کہا کہ ان کا مظاہرہ جاری رہے گا وہ رکنے والے نہیں۔

بی جے پی کے شہریت قانون حامی ریلی پر انھوں نے تنقید کرتے ہوئے کہا کہ 'ہمارے مظاہروں میں لوگ بھارت کا جھنڈا لے کر آتے ہیں اور ان کی ریلی میں بھگوا جھنڈا ، ہم آئین کی بات کرتے ہیں اور وہ لوگ گولی مارنے کا نعرہ لگاتے ہیں'۔

عمر خالد نے مزید کہا کہ شہریت قانون کے خلاف مظاہرہ کرنے والے کوئی تشدد نہیں کر رہے، تشدد ایک ہی طرف سے ہورہا ہے اور وہ پولیس کی طرف سے کیا جارہا ہے۔