المیہ: دو لاکھ عازمین حج کے لیے محض 170 ڈاکٹر

رواں برس 2 لاکھ عازمین حج، حج مبرور کی سعادت حاصل کرنے جا رہے ہیں، خدا کے ان مہمانوں کے طبی معائنے کے لیے ڈاکٹرز کی قابل لحاظ کمی محسوس کی جا رہی ہے۔

حکومت ہند کی جانب سے 620 حج معاونین پر مشتمل ایک ٹیم تیار کی گئی ہے جس میں صرف 170 ڈاکٹرز حکومت کی طرف سے فراہم کئے گئے ہیں، جو حاجیوں کا طبی معائنہ کریں گے۔

حج مشن 2019 کے لیے حکومت ہند کی جانب سے تیاریاں آخری مراحل میں ہیں۔ آئندہ ماہ 4 جولائی سے حج کی پہلی پرواز شروع ہوگی۔ اس کے لیے حکومت کی جانب سے حج معاونین ٹرینگ بھی دے رہے ہیں۔

نئی دہلی کے اسکوپ بلڈنگ میں میڈیکل اور پیرا میڈیکل عملہ و دیگر معاونین کی ٹریننگ ہوئی، جس کا سلسلہ کل تک جاری ر ہے گا۔

تقریباً 620 افراد پر مشتمل ٹیم کو سعودی عرب بھیجا جائے گا۔ جس میں 351 میڈیکل اور پیرا میڈیکل فارماسسٹ ہیں جب کہ 170 ڈاکٹر ہیں۔

اس کے ساتھ ساتھ دیگر معاون بھی ٹیم میں شامل ہیں۔ طبی عملہ میں بڑی تعداد میں خواتین بھی شامل ہیں، جنہیں اس مقصد سے ٹیم میں شامل کیا گیا ہے کہ وہ ضرورت پڑنے پر حجاج کو سروس دے سکیں۔

خاص بات یہ ہے کہ بھارت سے جانے والے دو لاکھ عازمین میں 2340 خواتین بغیر محرم کے کے تنہا سفر حج پر روانہ ہو رہی ہیں۔

جس کے لئے حکومت نے خصوصی انتظامات کرنے کا دعویٰ کیا ہے۔

اقلیتی وزارت کے حج محکمہ نے ای ٹی وی بھارت کو بتایا کہ 620 افراد پر مشتمل یہ ٹیم 4 جولائی سے پہلے ہی سعودی عرب پہنچ جائے گی۔

دو لاکھ حاجیوں کے طبی سہولت کے لیے محض 170 ڈاکٹرز فراہم کرنے پر سوالات کئئے جا رہے ہیں۔