شرومنی اکالی دل کی رہنما اور زرعی بل کی مخالفت میں مرکزی حکومت سے استعفیٰ دینے والی ہرسمرت کور بادل نے قومی جمہوری اتحاد (این ڈی اے) سے علیحدگی کے بعد مودی حکومت پر شدید نکتہ چینی کی۔
ہرسمرت کور نے ایک ٹوئٹ میں لکھا کہ بھارت کے سابق وزیر اعظم اٹل بہاری واجپئی کی جانب سے بنائی گئی این ڈی اے سےجو امید تھی اب وہ نہیں رہی۔
انہوں نے ٹوئٹ کیا کہ اگر 3 کروڑ پنجابیوں کا درد اور احتجاج بھارت حکومت کے سخت موقف کو تبدیل کرنے میں ناکام رہتا ہے تو یہ واجپئی اور بادل کی تشکیل کردہ این ڈی اے نہیں ہے۔ایک اتحاد اپنے سب سے پرانی اتحادی جماعت کی بات نظر انداز کردیتا ہے اور پورے ملک کو کھیلانے والوں کی اپیل پر آنکھیں بند کرلینا کہیں سے بھی پنجاب کے مفاد میں نہیں ہے۔
واضح رہے کہ 26 ستمبر کو اکالی دل نے زرعی قانون کے مسئلے پر بی جے پی کی سربراہی والی این ڈی اے چھوڑنے کا فیصلہ کیا۔ یہ تیسری پارٹی ہے جس نے این ڈی اے سے علیحدگی اختیار کی ہے، اس سے قبل شیوسینا اور تیلگو دیشم نے بھی این ڈی اے کا ساتھ چھوڑ دیا ہے۔