نئی دہلی: کار کی ٹکر سے دو افراد ہلاک

دریا گنج کے ڈیلائٹ سنیما کے قریب پیر کی شب ایک بے قابو کار نے رکشہ میں ٹکر مار دی جس سے رکشہ پر سوار دو لوگوں کی موقع پر ہی موت واقع ہوگئی۔

نئی دہلی میں واقع دریا گنج کے ڈیلائٹ سنیما کے قریب پیر کی شب پیش آنے والے ایک سڑک حادثے کے سی سی ٹی وی فوٹیج منظر عام پر آئے ہیں۔ اس میں دیکھا جارہا ہے کہ ایک کار تیز رفتار سے رکشہ میں ٹکر مارتی ہے۔ اس حادثے میں رکشہ ڈرائیور اور اس پر سوار خاتون موقع پر ہی جاں بحق ہوگئے۔

معلومات کے مطابق پیر کی رات ریشما نامی خاتون اپنے دو بچوں کے ساتھ رکشہ پر گھر جارہی تھی، جب وہ ڈیلائٹ سنیما کے قریب پہنچی تو پیچھے سے آرہی ایک تیز رفتار کار نے اس کے رکشہ میں ٹکر مار دی جس سے ریشما اور رکشہ ڈرائیور کی موقع پر ہی موت ہوگئی۔

ریشما اور رکشہ ڈرائیور کی موقع پر ہی موت ہوگئی۔ اس حادثے کے بعد بھی ڈرائیور نہیں رکا اور گاڑی لے کر فرار ہونے لگا لیکن موقع پر موجود لوگوں نے کار کا پیچھا کیا اور جامع مسجد علاقے میں اسے پکڑ لیا۔

پولیس کے مطابق اس معاملے میں کار ڈرائیور اور اس کے دوست کو گرفتار کیا گیا ہے۔ کار کے ڈرائیور کی شناخت درشن لال کے طور پر ہوئی ہے جب کہ اس کے ساتھی کا نام بسنت کمار بتایا گیا ہے۔ حادثہ کے وقت دونوں شراب کے نشے میں تھے۔