اولی نے مودی کو فون کیا

نقشے کے تعلق سے کچھ مہینوں سے بھارت اور نیپال کے مابین جاری تلخی کو دور کرنے کی کوشش کے تحت نیپال کے وزیراعظم کے پی شرما اولی نے آج بعد دو پہر وزیر اعظم نریندر مودی کو ٹیلی فون کرکے 74 ویں یوم آزادی کی مبارکباد دی۔

وزارت خارجہ کے مطابق اولی نے وزیراعظم مودی کو اقوام متحدہ کی سلامتی کونسل کا عارضی رکن منتخب ہونے پر بھی مبارکباد دی۔

وزارت خارجہ کے مطابق دونوں لیڈروں نے ایک دوسرے کو کووڈ 19 وبا کے اثرات کو کم کرنے کی کوششوں کی حمایت کی اور یکجہتی کا اظہار کیا ۔

مودی نے اس سلسلے میں نیپال کو ہندوستان کی طرف سے ہر ممکن امداد جاری رکھنے کی پیش کش کی۔انہوں نے اولی کو ٹیلی فون کرنے کے لئے کا شکریہ ادا کیا اور ہندوستان اور نیپال کے مابین مشترکہ ثقافتی اور تہذیبی رابطے کو یاد کیا ۔

اس سے پہلے وزیراعظم مودی نے 74 ویں یوم آزادی کی تقریب سے خطاب کرتے ہوئے لال قلعہ کی فصیل سے آج کہا کہ ہمسایہ ممالک ہندوستان کی سلامتی ، ترقی اور اعتماد میں شراکت دار ہیں اور ہندوستان اپنے ہمسایہ ممالک کے ساتھ صدیوں پرانے تعلقات کو مزید گہرا کرنا چاہتا ہے۔