ریاست اتر پردیش کے ڈائریکٹر جنرل آف پولیس کے دفتر کی جانب سے محرم کے حوالے سے جاری کردہ سرکیولر پر تنازع کے پس منظر میں 'قومی اقلیتی کمیشن' نے ریاست کے چیف سکریٹری آر کے تیواری کو نوٹس جاری کرتے ہوئے کہا کہ 'وہ اس سرکیولر پر وضاحت پیش کریں۔
یہ نوٹس قومی اقلیتی کمیشن کے ڈپٹی چیئرمین عاطف رشید کی ہدایت پر جاری کیا گیا ہے۔
عاطف راشد نے کہا کہ 'اترپردیش کے ڈی جی پی کی جانب سے ماہ محرم کے حوالے سے جاری کردہ متنازع ہدایات جاری کی گئی ہیں۔
معاملے کی حساسیت کو دیکھتے ہوئے قومی اقلیتی کمیشن نے ریاست اتر پردیش کے چیف سکریٹری کو نوٹس جاری کرتے ہوئے متنازع نکات پر جواب اور وضاحت طلب کی ہے۔
کمیشن نے یہ بھی سوال کیا ہے کہ 'جب سرکیولر 'خفیہ' تھا تو پھر یہ عوامی طور پر کیوں دستیاب ہے؟
اس کے علاوہ قومی اقلیتی کمیشن نے نوٹس کے ذریعے معلوم کیا ہے کہ کب اور کتنے ایسے معاملے سامنے آئے ہیں جس کا ذکر محرم سے متعلق جاری کیے سرکیولر میں کیا گیا ہے۔
واضھ رہے کہ کئی شیعہ تنظیموں نے سرکیولر میں دیئے گئے کچھ نقاط اور اس میں استعمال کی گئی زبان کے خلاف متعدد جگہوں پر احتجاج کیا ہے۔