لوک سبھا انتخابات میں بی جے پی کی زبردست جیت کے بعد وزیراعظم نریندر مودی اور بی جے پی کے صدر امت شاہ نے پارٹی کے سینئر رہنما و سابق نائب وزیراعظم لال کرشن اڈوانی اور بی جے پی کے سابق صدر مرلی منوہر جوشی کے گھر جاکر ان سے ملاقات کی اور دونوں رہنماؤں کے پیر چھو کر آشیرواد لیا۔
مودی نے دونوں ملاقاتوں کی تصویر ٹوئٹر پر شیئر کی ہے۔
مودی شاہ کے ساتھ سب سے پہلے 27، پرتھوی راج پر واقع اڈوانی کی رہائش گاہ پر پہنچے۔ اڈوانی نے ان کا دروازے پر استقبال کیا اور مسٹر مودی نے پوری عقیدت کے ساتھ جھک کر دونوں ہاتھوں سے مسٹر اڈوانی کے پیر چھوئے۔
اڈوانی اس سے جذباتی ہوگئے اور انہوں نے مسٹر مودی کو دونوں ہاتھوں سے آشیرواد دیا۔مودی نے ٹوئٹر پر لکھا محترم اڈوانی جی کے گھر جاکر ان سے ملاقات کی۔ آج بی جے پی کی یہ کامیابی ممکن ہوئی ہے کیونکہ اڈوانی جیسے ععظیم لوگوں نے پارٹی کو بنانے اور لوگوں کے سامنے نئی سوچ پیش کرنے کے لئے دہائیوں محنت کی ہے۔
خیال رہے کہ دونوں رہنماؤں میں نظریاتی اختلاف رہے ہیں۔ کبھی پارٹی کے سب سے طاقتور لیڈروں میں شامل رہے اڈوانی نے اس بار لوک سبھاکا الیکشن نہیں لڑا اور سرگرم سیاست کو اب تقریبا پوری طرح خیرباد کہہ چکے ہیں۔
اڈوانی سے ملاقات کے بعد مسٹر مودی اور شاہ کی جوڑی رائے سینا روڈ پر ڈاکٹر جوشی کے گھر پہنچی۔ ڈاکٹر جوشی نے وزیراعظم کا گرمجوشی سے استقبال کیا۔ وزیراعظم نے ان کے پیر چھوکر آشیرواد لیا اور ڈاکٹر جوشی نے اپنے ہاتھ سے انہیں مٹھائی کھلائی۔
