مذہبی عبادت گاہوں میں صفائی کے لئے بیداری مہم

انڈین مسلمس فار پروگریس اینڈ ریفارمس نے مسجدوں، مندروں اور دیگر مذہبی مقامات سے کوڑا کرکٹ ہٹانے کے لیے ایک مہم شروع کی ہے۔

تنظیم کے پروگرام کوآرڈینیٹر انجلا خان نے بتایا کہ جب ہم خود مسجد اور مندر جیسے مقدس مقامات پر جاتے ہیں اور ان سے ہمیں عقیدت بھی ہے تو ہمارے اوپر ان کی صفائی کی بھی ذمہ داری عائد ہوتی ہے اور یہ تبھی ممکن ہے جب ہم سب عوامی طور پر اس کی ذمہ داری لیں اور پختہ عزم کریں کہ نہ گندگی پھیلائیں گے اور نہ ہی لوگوں کو گندگی پھیلانے دیں گے اور اگر کوئی ایسا کرتا ہے تو انسانی اصولوں کو مدنظر رکھتے ہوئے ہم اس کی اصلاح کرنے کی کوشش کریں گے۔

مذہبی عبادت گاہوں میں صفائی کے لئے بیداری مہم

انڈین مسلمس فار پروگریس اینڈ ریفارمس کی طرف سے اس صفائی اور بیداری مہم کو فروغ دینے کیلئے لوگوں کی زندگیوں سے اسے جوڑنے کا فیصلہ کیا گیا ہے، جس کے لئے امپار ایک دیرینہ حکمت عملی بھی تیار کر رہا ہے۔

اس تعلق سے پرانی دہلی میں صفائی مہم اور بیداری پروگرام کا انعقاد عمل میں آیا، جس کے تحت امپار کی رضاکار ٹیم نے مینا بازار، جامع مسجد، حج منزل، جین مندر، گوری شنکر مندر، شیش گنج گرودوارہ اور سینٹرل بپٹسٹ چرچ کے آس پاس کے علاقے کا احاطہ کیا اور اس کی صفائی کی۔

بیداری ٹیم نے کووڈ 19 بحران کے مدنظر صفائی ستھرائی اور اس کی اہمیت پر بھی روشنی ڈالی تاکہ لوگوں کو آگہی ہو سکے۔ اہم بات یہ ہے کہ صحت اور حفظان صحت کے طریقوں کے تئیں لوگوں کے طرز عمل میں تبدیلی لانے اور اس طرح کے کاموں میں عوامی شرکت کے مقصد پر زور دیا گیا۔

صفائی مہم کے دوران فیس ماسک،دستانے کوویڈ19 ہینڈ بل بھی تقسیم کیے گئے۔ انہوں نے امپار اور اس کے ذریعہ کئے جارہے کام کے بارے میں بھی دریافت کیا اور کچھ لوگوں نے یقین دلایا کہ وہ امپار کی آئندہ صفائی مہم میں بھی حصہ لیں گے۔

رضاکار ٹیم میں شان فیلڈ منیجر امپار، ڈاکٹر عادل، ڈاکٹر آرزو، مسٹر اختر، مسٹر شاہد، مسٹر سہراب، مسٹر ایوب، مسٹر چودھری اکرم، مسٹر فہیم، مسٹر نور الٰہی اور مسٹر شہزاد سمیت متعدد افراد شامل تھے۔ امپائر کی پروگرام کوآرڈینیٹر انجلا خان نے بتایاکہ تنظیم آنے والے دنوں میں دہلی کے دوسرے حصوں میں بھی ایسی مہم چلانے اور عوام کو اس سے وابستہ کرنے کیلئے پرعزم ہے۔