ملک میں ایک دن میں کورونا سے 28 ہزار سے زائد افراد صحتیاب

ملک میں لگاتار دوسرے دن کورونا وائرس سے شفایاب ہونے والوں کی تعداد میں اضافے کے ساتھ گزشتہ 24 گھنٹوں کے دوران کورونا کے 28 ہزار سے زیادہ افراد صحتیاب ہوئے ہیں جس سے شفایاب ہونے والوں کی تعداد 7.53 لاکھ ہوگئی ہے۔

ملک میں پہلی بار ایک دن میں 28،472 افراد صحتمند ہوئے ہیں۔ اسی عرصہ کے دوران وائرس کے 37،724 نئے کیسز رپورٹ ہوئے ہیں جس سے متاثرہ افراد کی تعداد بڑھ کر 11.93 لاکھ ہوگئی ہے۔

مرکزی وزارت صحت کی جانب سے بدھ کے روز جاری تازہ ترین اعداد و شمار کے مطابق ملک میں گذشتہ 24 گھنٹوں کے دوران کورونا وائرس کے 37،724 کیسز کی تصدیق ہوئی ہے جس سے متاثرہ افراد کی مجموعی تعداد 11،92،915 ہوگئی جبکہ اموات کی تعداد 648 سے بڑھ کر 28،732 ہوگئی۔ اس دوران 28،472 مریض صحتیاب ہوئے ہیں، اب تک 7،53،050 افراد کورونا سے صحت یاب ہوئے ہیں۔ اس وقت ملک میں کورونا وائرس کے 4،11،133 فعال کیسز ہیں۔

مختلف ریاستوں میں گذشتہ 24 گھنٹوں کے دوران صورتحال پر نظر ڈالیں تو سب زیادہ متاثر مہاراشٹر میں کورونا وائرس کے 8،336 نئے کیسز رپورٹ ہوئے اور 246 افراد کی موت ہوئی۔ یہاں متاثرہ افراد کی تعداد اب 3،27،031 اور ہلاک ہونے والوں کی تعداد 12،276 ہے جبکہ 1،82،217 افراد شفایاب ہوچکے ہیں۔