Modi on Opposition INDIA بھارت کہہ رہا ہے کرپشن، کنبہ پروری اور اپیزمنٹ بھارت چھوڑو، مودی کا اپوزیشن پر حملہ

وزیر اعظم مودی اور بی جے پی لیڈران اپوزیشن اتحاد پر مسلسل حملے کر رہے ہیں۔ اس سے پہلے بی جے پی کی پارلیمانی پارٹی کی میٹنگ میں بھی پی ایم مودی نے اپوزیشن اتحاد کو آڑے ہاتھوں لیا اور کہا کہ یہ ایک گھمنڈی اتحاد ہے۔

نئی دہلی: وزیر اعظم نریندر مودی نے بدھ کے روز 'بھارت چھوڑو تحریک' میں حصہ لینے والوں کو خراج عقیدت پیش کیا اور مہاتما گاندھی کی طرف سے شروع کی گئی تحریک کو یاد کرتے ہوئے کہا کہ بھارت اب بدعنوانی، کنبہ پروری اور خوشامد کی سیاست (اپیزمنٹ) کے خلاف متحد ہے۔ مودی نے اپوزیشن کو بالواسطہ طور پر نشانہ بنایا ہے۔

1942 میں بابائے قوم مہاتما گاندھی کی قیادت میں ہندوستان چھوڑو تحریک شروع ہوئی تھی اور اس تحریک نے ملک کو انگریزوں سے آزادی دلانے کرنے میں اہم کردار ادا کیا۔ تحریک شروع ہونے کے پانچ سال بعد 15 اگست 1947 کو ملک آزاد ہوا۔ مودی نے ٹویٹ کیا کہ 'ان عظیم لوگوں کو خراج عقیدت جنہوں نے بھارت چھوڑو تحریک میں حصہ لیا۔ گاندھی جی کی قیادت میں اس تحریک نے بھارت کو نوآبادیاتی راج سے آزاد کرانے میں اہم کردار ادا کیا۔'

انہوں نے کہا، 'آج بھارت ایک آواز میں کہہ رہا ہے کہ کرپشن بھارت چھوڑ دو۔ کنبہ پروری بھارت چھوڑ دو۔ اپیزمنٹ بھارت چھوڑ دو۔' مودی نے بارہا اپوزیشن پارٹیوں پر بدعنوانی، کنبہ پروری اور خوشامد کی سیاست کرنے کا الزام لگایا ہے۔ حال ہی میں ایک پروگرام سے خطاب کرتے ہوئے مودی نے بھارت چھوڑو تحریک کے آغاز کے دن کو تاریخی قرار دیا اور کہا کہ اس نے بھارت کی جدوجہد آزادی میں نئی ​​توانائی پیدا کی۔ انہوں نے بی جے پی کارکنوں سے 'بھارت چھوڑو تحریک' سے متاثر ہو کر 'کرپشن-بھارت چھوڑو، کنبہ پروری-بھارت چھوڑو، اپیزمنٹ-بھارت چھوڑو' کی طرز پر مہم چلانے کی اپیل کی۔