کانگریس نے مودی حکومت کو کسان مخالف بتاتے ہوئے کہا ہے کہ سات سال سے ملک کے کسانوں کوکچلنے کاکام کیا جارہا ہے ان کے حقوق کوپامال کیا جارہا ہے۔
کانگریس محکمہ مواصلات کے چیف رندیپ سنگھ سرجے والا نے ہفتہ کو یہاں جاری بیان میں کہا کہ بھارتیہ جنتا پارٹی (بی جے پی) حکومت کبھی کسانوں پرلاٹھی برساتی ہےتو کبھی آنسو گیس چھوڑتی ہے۔ تو کبھی ان کے راستوں میں کیل کانٹے بچھاتی ہے۔ سڑکوں پر سوتے مجبور کسانوں کو حکومت کبھی دہشت گرد کبھی خالصتانی بتاتی ہے۔
کسانوں کے ساتھ کانگریس کی وابستگی کا اظہار کرتے ہوئے انہوں نے کہا کہ کانگریس پارٹی کسانوں کے آج منعقدہ مظاہرہ کی حمایت کرتی ہے اور حقوق کی ہر لڑائی میں ملک کے کسان کے ساتھ کھڑی ہے۔