طلاق کے قانون پر جشن تو اناؤ پر خاموشی کیوں؟

کانگریس مہیلا مورچہ کی سربراہ سشمتا دیو نے ریپ کیس کے ملزم کلدیپ سنگھ سینگر کے معاملے میں وزیر اعظم کی خاموشی پر نکتہ چینی کی۔

اناؤ ریپ کیس معاملہ میں عدالت عظمی کی مداخلت کو دیر آید درست آید قرار دیتے ہوئے کانگریس مہیلا مورچہ کی سربراہ سشمتا دیو نے وزیراعظم نریندررمودی اور وزیر داخلہ امت شاہ سمیت بی جے پی پر نکتہ چینی کرتے ہوئے کہا کہ گزشتہ 2 برس سے پوری بی جے پی ریپ کیس کے ملزم سینگر کو بچانے کی کوشش کررہی تھی اور وزیر اعظم مودی اور امت شاہ سمیت اترپردیش کے وزیر اعلی یوگی آدتیہ ناتھ اس کے ساتھ کھڑے تھے۔

متاثرہ کے والد کا قتل کیا گیا، متاثرہ کے اہل خانہ کے ایک 8 سالہ بچہ پر یوگی آدتیہ ناتھ کی سرکار نے چوری کا مقدمہ درج کر رکھا ہے۔متاثرہ کا خاندان خوف کے سایہ میں جی رہا ہے۔

سشمتا دیو نے کہا کہ اناؤ معاملہ پر بیٹی بچاؤ بیٹی پڑھاو گینگ کیوں خاموش ہے ؟

انہوں نے مزید کہا کہ طلاق پر اپنی پیٹھ تھپتپانے والے لوگ اس معاملہ میں چپ کیوں ہیں؟

امت شاہ جو می ٹو پینل کے سربراہ ہیں، کیا ہم ان سے یہ امید کر سکتے ہیں کہ وہ اپنی ذمہ داریوں کے ساتھ انصاف کر پائیں گے جو خود اپنے رکن اسمبلی سینگر جو عصمت دری کا ملزم ہے، کے خلاف کوئی کاروائی نہیں کر پائے۔