لاک ڈاؤن میں دوکاندار کی قابل ستائش پہل

جب دوکاندار کالا بازاری اور اشیاء کی قیمتوں میں اضافہ کرکے منافع کمانے میں مصروف ہیں تو وہیں پرانی دہلی کی ایک دوکاندار اپنا منافع ختم کرکے ضروری دودھ سمیت ضروری اشیا فروخت کر رہی ہے۔

کورونا وائرس کے چلتے جہاں دنیا بھر میں افراتفری کا ماحول ہے تو وہیں بھارتی وزیراعظم نریندر مودی کے ملک بھر میں لاک ڈاؤن کے اعلان کے فوراً بعد ضروری اشیاء کی خریدار و فروخت میں تیزی آ گئی ہے۔

کچھ لوگ حالات کا فائدہ اٹھاتے ہوئے اپنا سامان مہنگے داموں میں فروخت کر رہے ہیں تو وہیں دوسری طرف کچھ ایسے بھی لوگ ہیں، جن سے دوسرے دکانداروں کو عبرت حاصل کرنی چاہیے۔

جی ہاں ہم بات کر رہے ہیں پرانی دہلی میں واقع شاہ جی ڈیری کی جنہوں نے ملک کے حالات کو دیکھتے ہوئے اپنی دکان پر 52 روپے فی لیٹر کی قیمت پر بکنے والے دودھ کی قیمت میں کمی کر دی ہے، اب وہ بغیر کسی منافع کے 40 روپے فی لیٹر میں فروخت کر رہے ہیں۔

ای ٹی وی بھارت کے نمائندے نے شاہ جی ڈیری کے مالک عباد سے بات کی، جس میں انہوں نے بتایا کہ ان کے والد نے حالات کو دیکھتے ہوئے یہ فیصلہ کیا ہے۔

انہوں نے مزید کہا کہ ہر شخص اپنی حیثیت کے حساب سے لوگوں کی مدد کر رہا ہے تو اسی لیے ہم نے اس طرح سے لوگوں کی مدد کرنے کا فیصلہ لیا ہے۔