'نقل مکانی کرنے والے مزدوروں کو منریگا میں ملے روزگار'

کانگریس نے وزیر خزانہ نرملا سیتارمن کے منریگا کے لیے اعلان شدہ رقم کا استقبال کرتے ہوئے کہا ہے کہ منریگا کی مزدوری 300 روپے کرنے کے ساتھ ہی گھر لوٹ رہے مزدوروں کو اس کا فائدہ دیا جانا چاہئے۔

دہلی میں کانگریس کے ترجمان آنند شرما نے پریس کانفرنس میں کہا کہ لاک ڈاؤن کی وجہ سے غریب کی روزی روٹی چلی گئی ہے اور نقل مکانی کرنے والے مزدور گاؤں کی طرف لوٹ رہے ہیں۔ اس لیے مزدوروں کو بھی گاؤں میں مہاتما گاندھی راشٹریہ روزگار گارنٹی یوجنا-منریگا کے تحت روزگار ملنا چاہئے اور منریگا دیہاڑی 300 روپے فی دن کی جانی چاہئے۔ محترمہ سیتارمن نے منریگا کےلیے 40 ہزار کروڑ روپے دینے کا آج اعلان کیا ہے۔

انہوں نے کہا کہ حکومت نے آج اعتراف کیا ہے کہ لاک ڈاؤن سے سب سے زیادہ متاثر شہری غریب اور نقل مکانی کرنے والے مزدور ہوئے ہیں۔ ان کا کہنا تھا کہ ان کی حالت کو سمجھتے ہوئے حکومت کو ان لوگوں کی جیب میں پیسہ ڈال کر ان کی مالی صلاحیت بڑھانی چاہئے۔

کانگریس کے ترجمان آنند شرما

مسٹر شرما نے کہا کہ گاؤں میں غریب خواتین لاک ڈاؤن سے پریشان ہیں۔ ان کے جن دھن کھاتے میں 500 روپے ڈالے گئے ہیں لیکن جن دھن کھاتے صرف 21 خواتین کے ہیں اس لیے منریگا سے غریب خواتین کو پیسہ دیے جانے چاہئے اور ان سب کی مدد ہونی چاہئے۔

ترجمان نے کہا کہ حکومت جسے پیکج بتا رہی ہے، صحیح معنی میں وہ پیکج نہیں ہے اور نہ ہی وہ جی ڈی پی کا 10 فیصدی ہے، جیسا کہ حکومت دعوی کر رہی ہے۔ یہ لوگوں کو فوری فائدہ دینے والا اقتصادی پیکج نہیں بلکہ معیشت بڑھانے کےلیے مالی مدد ہے اور یہ جی ڈی پی کا دس نہیں بلکہ تقریباً تین فیصدی ہے۔