کورونا وائرس: دہلی حکومت مزید سخت فیصلے لے سکتی ہے

دہلی کی عوام کو کورونا وائرس سے بچانے کے لیے دہلی حکومت مزید سخت فیصلے لے سکتی ہے، آج بروز جمعرات کو دہلی کے وزیراعلی کیجریوال اور ایل جی انیل بیجل کے درمیان ایک اہم میٹنگ ہونے والی ہے۔

میٹنگ میں احتیاط برتنے اور دیگر اقدامات کرنے پر غور و خوض کرنے بعد دونوں کے اتفاق سے فیصلے لیے جائیں گے۔

گزشتہ روز بھی لیفٹننٹ گورنر انیل بیجل اور وزیراعلی اروند کیجریوال کے درمیان فون پر بات چیت ہوئی تھی۔

اس تعلق سے ایل جی نے تفصیلات دیتے ہوئے بتایا تھا کہ میٹنگ کے بعد کیجریوال نے کہا کہ' کورونا وائرس پھیلاؤ حکومت کے لیے ایک بڑا چیلینج ہے، ہم سبھی کو مل کر اس وبا کو روکنا ہے، اسے دور بھگانا ہے، اس وبا سے ڈرنے کی ضرورت نہیں ہے ہم ضرور جیتیں گے سبھی اپنے آس پاس صفائی رکھیں'۔

واضح رہے کہ کورونا وائرس سے تحفظ کے پیش نظر دہلی حکومت نے گزشتہ ہفتے دہلی کے تمام جم، سوئمنگ پل، اسپا سینٹر، نائٹ کلب بند کرنے کے احکامات جاری کیے ہیں۔

اس قبل ہی دہلی میں تمام اسکول و کالجز بند کرنے کے احکامات جاری کیے گئے تھے۔

دہلی میں ہفتہ واری بازاروں پر بھی روک لگادی گئی ہے لیکن مالز وغیرہ میں معمول کی طرح عام لوگوں کی آمد کو دیکھتے ہوئے تمام مالز کو بند کیے جانے پر غور و خوض کیا جارہا ہے۔

حالانکہ اس فیصلے سے روز مرہ کی گھریلو اشیأ کی دستیابی میں دقت آسکتی ہے انھیں سب پہلوؤں پر آج بات چیت کی جائے گی۔

دھیان رہےکہ کورونا وائرس سے متاثر مریضوں کی تعداد میں اضافہ ہوتا جارہا ہے اور گزشتہ شب صفدر جنگ اسپتال میں وائرس سے متاثر ایک شخص نے اسپتال کی ساتویں منزل سے چھلانگ لگاکر خودکشی کرلی تھی۔

اس وائرس نے عالمی سطح پر دنیا کے تقریباً تمام لوگوں کے ذہن میں حاوی ہوگیا ہے، ہمہ وقت لوگ اسی کے بارے میں سوچتے اور گفتگو کرتے ہوئے نظر آ رہے ہیں۔

اس سے بچنے کے لیے لوگ مصافحہ کرنے سے گریز کر رہے ہیں اور باربار اپنے ہاتھ میں سینیٹائیزر لگا رہے ہیں۔

اب تک اس مہلک بیماری سے دو لاکھ افراد متاثر ہوئے ہیں اور تقریباً 8 ہزار افراد ہلاک ہوچکے ہیں۔

اٹلی ان میں سب سے زیادہ متاثرہ ملک ہے۔