'حکومت بکرا منڈی لگانے کی اجازت دے'

عیدالاضحی کے موقع پر کورونا وائرس کا حوالہ دے کر دہلی میں بکرا منڈی لگانے کی اجازت نہ دیئے جانے پر مسلمانوں میں حکومت و انتظامیہ کے خلاف زبردست ناراضگی ہے۔

عید الاضحیٰ کا تہوار قریب ہے ، اس تہوار میں مسلمان سنت ابراہیمی ادا کرنے کے لیے بکروں کی خریداری کرتے ہیں لیکن کورونا وائرس کی وباؤ کے پھیلاؤ کو وجہ بتاکر ایم سی ڈی کہیں بھی بکرے کی خرید و فروخت کرنے کی اجازت نہیں دے رہی ہے۔ جس پر مسلمانوں نے انتظامیہ کے اس رویہ کے خلاف شدید ناراضگی کا اظہار کیا ہے۔

حکومت کی اسی رویہ پر ناراضگی کا اظہار کرتے ہوئے مدرسہ و مسجد غازی الدین کے امام مفتی قاسم قاسمی نے کہا کہ حکومت کو ان تمام بازاروں اور منڈیوں سے کورونا وائرس کا خطرہ نظر نہیں آ رہاہے۔ جنہیں کھولنے کی اجازت حکومت نے دے دی ہے لیکن بکرا فروشوں کو خرید و فروخت کرنے کی اجازت نہیں دی جا رہی ہے۔ انہوں نے حکومت سے 10 دن کے لیے بکرا منڈی لگانے کی اجازت دینے کا مطالبہ کیا ہے تاکہ اس سے مسلمانوں کو کافی آسانی ہو جائے گی اور تمام لوگ اپنے تہوار کے لیے خریداری کر سکیں گے۔

انہوں نے کہا کہ اگر حالات ایسے ہی رہا تو اس سے نہ صرف عید الاضحیٰ پر مسلمانوں کو پریشانی ہوگی بلکہ جو کسان اور چرواہے اپنے جانور فروخت کرنے دہلی آتے ہیں انہیں بھی دشواریوں کا سامنا کرنا پڑے گا۔

انہوں نے حکومت اور انتظامیہ سے بکرا منڈی لگانے کی اجازت دینے کا مطالبہ کیا ہے۔