نئی دہلی: بھارتیہ جنتا پارٹی 2024 کے لوک سبھا انتخابات کی تیاریوں میں مصروف ہے۔ اس سلسلے میں وزیر اعظم نریندر مودی آج نیشنل ڈیموکریٹک الائنس (این ڈی اے) کے ارکان پارلیمنٹ کے ساتھ میٹنگ کریں گے۔ بی جے پی کے ذرائع کے مطابق منگل کو بی جے پی لیڈروں نے قومی راجدھانی دہلی میں ایک میٹنگ کی، جس میں 2024 کے عام انتخابات کے پروگرامز پر تبادلہ خیال کرنے کے لیے این ڈی اے کے ممبران پارلیمنٹ کے 10 گروپ بنائے گئے۔ ذرائع سے موصولہ اطلاع کے مطابق آج سے شروع ہونے والی این ڈی اے ارکان پارلیمنٹ کی یہ میٹنگ 11 دن تک جاری رہے گی۔
یہ گروپ اتحادی جماعتوں کی انتخابی سرگرمیوں میں زیادہ تال میل لانے کی کوششوں کے ایک حصے کے طور پر بنائے گئے ہیں۔ وزیر اعظم نریندر مودی آج شام چھ بجے مہاراشٹرا سدن میں مغربی اتر پردیش، بندیل کھنڈ اور برج علاقے کے این ڈی اے ممبران پارلیمنٹ کے گروپوں کے ساتھ کلسٹر 1 میٹنگ کرنے والے ہیں۔ ذرائع کے مطابق بی جے پی کے قومی صدر جے پی نڈا، وزیر دفاع راج ناتھ سنگھ اور وزیر داخلہ امت شاہ بھی میٹنگ میں موجود ہوں گے۔
مغربی بنگال، جھارکھنڈ اور اڈیشہ سے تعلق رکھنے والے این ڈی اے کے ارکان پارلیمنٹ کے گروپوں کے ساتھ کلسٹر-2 میٹنگیں آج شام 7 بجے پارلیمنٹ انیکسی بلڈنگ میں طے ہیں۔ اس میٹنگ میں امیت شاہ اور راج ناتھ سنگھ موجود رہیں گے۔ پی ایم مودی کو ہر گروپ کی میٹنگ کی صدارت کرنی ہوگی۔ ذرائع نے بتایا کہ پہلے دن کی میٹنگ میں اتر پردیش، مغربی بنگال، جھارکھنڈ اور اڈیشہ کے ارکان پارلیمنٹ شرکت کریں گے۔
این ڈی اے کی 25 ویں سالگرہ
بی جے پی نیشنل ڈیموکریٹک الائنس (این ڈی اے) کی 25 ویں سالگرہ بھی منائے گی۔ اس کے ساتھ ہی حکمراں اتحاد 2024 کے لوک سبھا انتخابات کے لیے حکمت عملی بنائے گا۔ مرکزی وزراء نتن گڈکری، امیت شاہ اور راج ناتھ سنگھ کے ساتھ ساتھ بی جے پی کے سربراہ جے پی نڈا کو این ڈی اے لیڈروں کے ساتھ تال میل کی ذمہ داری دی گئی ہے۔ چار قائدین بشمول بھوپیندر یادو، سربانند سونووال، ترون چگ اور ریتوراج کو این ڈی اے کے پروگراموں کی ذمہ داری دی گئی ہے۔ پرہلاد پٹیل، ارجن رام میگھوال اور وی مرلی دھرن سمیت چار اور لیڈران بھی ان سے وابستہ ہیں۔ وزراء اور ارکان پارلیمنٹ کی ایک اور ٹیم بھی ہوگی جو ان کاموں میں مدد کرے گی۔
مزید پڑھیں: Lalu Yadav on Modi مودی الیکشن ہارنے کے بعد بیرون ملک بس جائیں گے، لالو کا طنز
پارلیمنٹ کے علاوہ قومی راجدھانی میں واقع مہاراشٹرا اور اتر پردیش بھون جیسے دیگر مقامات پر بھی اجلاس منعقد کیے جائیں گے۔ یہ پہلا موقع ہے کہ اتحاد کے رہنما خطہ وار بات چیت کریں گے۔ ذرائع نے بتایا کہ بی جے پی لوک سبھا انتخابات میں اپنے اتحادیوں کے ساتھ 50 فیصد ووٹ شیئر حاصل کرنے کے منصوبے پر کام کر رہی ہے۔ بی جے پی قیادت نے 160 نسبتاً کمزور حلقوں کی نشاندہی کی ہے اور پارٹی ان حلقوں میں امکانات تلاش کرنے کی کوششیں کر رہی ہے۔ اپوزیشن کے متحد ہونے کے ساتھ، بھارتیہ جنتا پارٹی (بی جے پی) کی زیر قیادت این ڈی اے نے 18 جولائی کو ایک میگا میٹنگ کی۔ بی جے پی زیرقیادت این ڈی اے میں 38 پارٹیاں شامل ہیں۔
