Monsoon Session اپوزیشن کے ہنگامے کے باعث لوک سبھا کی کارروائی دوپہر 2 بجے تک ملتوی

وقفہ سوال شروع ہوتے ہی اپوزیشن ارکان ہاتھوں میں پلے کارڈ لے کر ایوان کے وسط میں آئے اور شور مچانا شروع کردیا۔ وہ منی پور پر بحث کرنے اور وزیر اعظم نریندر مودی سے ایوان میں آنے کی مانگ کرتے ہوئے حکومت کے خلاف احتجاج کرنے لگے۔

نئی دہلی:اپوزیشن کے ہنگامے کی وجہ سے جمعرات کو لوک سبھا میں وقفہ سوالات نہیں ہو سکا اور ایوان کی کارروائی دوپہر 2 بجے تک ملتوی کر دی گئی۔ جیسے ہی ایوان 11 بجے شروع ہوا، کانگریس لیڈر ادھیر رنجن چودھری نے پریذائیڈنگ آفیسر راجندر اگروال کو بتایا کہ تمام ممبران لوک سبھا اسپیکر اوم برلا کو پوڈیم پر دیکھنا چاہتے ہیں۔ انہوں نے کہا کہ ’’ہم لوگوں کے جو بھی مسائل ہوں گے، انہیں سلجھالیں گے۔ ہم سب اسپیکر کو سیٹ پر دیکھنا چاہتے ہیں۔ آپ ہمارے جذبات اور درخواستیں اسپیکر تک پہنچائیں اور انہیں بلائیں۔ ‘‘

اس پر اگروال نے کہا ’’آپ کے جذبات کو اسپیکر تک پہنچادیا جائے گا۔ ‘‘ اس کے بعد وقفہ سوال شروع کرتے ہوئے اگروال نے سوال پوچھنے کے لیے ممبر کا نام پکارا۔ اس کے بعد اپوزیشن ارکان ہاتھوں میں پلے کارڈ لے کر ایوان کے وسط میں آئے اور شور مچانا شروع کردیا۔ انہوں نے نعرے لگائے اور ہنگامہ کرنے لگے۔ وہ منی پور پر بحث کرنے اور وزیر اعظم نریندر مودی سے ایوان میں آنے کی مانگ کرتے ہوئے نعرے بازی اور ہنگامہ کرنے لگے۔

اس دوران مکانات اور شہری امور کے وزیر ہردیپ پوری اور جل شکتی کے وزیر گجیندر سنگھ شیخاوت نے ایک ایک ممبر کے سوال کا جواب دیا لیکن ہنگامہ آرائی کی وجہ سے ان کے پورے جوابات واضح طور پر سنائی نہیں دیے۔ اگروال نے شور مچانے والی اپوزیشن پارٹیوں کے ارکان سے اپیل کی کہ وہ اپنی اپنی نشستوں پر جائیں اور وقفہ سوالات کو ہموار طریقے سے چلنے دیں، لیکن ان پر اس کا کوئی اثر نہیں ہوا۔ ہنگامہ اور نعرے بازی تھمتے نہ دیکھ کر پریزائیڈنگ آفیسر اگروال نے ایوان کی کارروائی دوپہر دو بجے تک ملتوی کر دی۔

واضح رہے کہ 20 جولائی کو شروع ہونے والے مانسون سیشن کے آغاز سے ہی اپوزیشن جماعتوں کے ارکان منی پور کے معاملے پر بحث کا مطالبہ کرتے ہوئے ہنگامہ آرائی اور شور و غل کررہے ہیں اور پی ایم مودی سے ایوان میں آکر بیان دینے کا مطالبہ کر رہے ہیں۔ اس کی وجہ سے کسی بھی دن وقفہ سوالات کا انعقاد خوش اسلوبی سے نہیں ہو سکا۔

یو این آئی