لاک ڈاون میں توسیع: ریلوے نے 39 لاکھ ٹکٹ منسوخ کردیئے

بھارتی ریلوے نے ملک گیر نافذ لاک ڈاون میں اضافہ کے وزیراعظم نریندر مودی کے اعلان کے بعد 3 مئی کی آدھی رات تک ہر قسم کی مسافر ٹرینوں کی آمد و رفت پر عائد پابندی میں توسیع کردی ہے۔

منگل کی صبح وزیراعظم نریندر مودی نے ملک گیر لاک ڈاون کو مزید 19 دن کی توسیع کرنے کا اعلان کیا، جس کے بعد ریلوے بورڈ نے تمام ریلوے زونز کو حکم جاری کرکے کہا کہ مسافر ریل کی تمام قسم کی خدمات 3 مئی کی آدھی رات تک دستیاب نہیں ہوں گی۔

تمام مسافر ٹرینوں کی معطلی کی وہ سے 15 اپریل تا 3 مئی کے درمیان بک کئے گئے تمام 39 لاکھ ٹکٹوں کو منسوخ کردیا گیا ہے۔

ریلوے کے مطابق منسوخ شدہ ٹکٹوں کی رقم آن لائن ٹکٹ بک کرنے والوں کے کھاتوں میں جمع ہوجائے گی جبکہ کاونٹرس پر بک کرنے والے 31 جولائی تک منسوخ شدہ ٹکٹوں کی رقم کا دعویٰ پیش کرسکتے ہیں۔

ریلوے نے مزید بتایا کہ 3 مئی کے بعد کی تواریخ میں بک کئے گئے ٹکٹوں کو اگر کوئی منسوخ کرنا چاہے تو کرسکتے ہیں جبکہ پوری رقم اس کے اکاونٹ میں جمع کردی جائے گی۔